Acisa Ribadeo celebrará a súa XI Gala Anual o vindeiro 19 de outubro

Ribadeo, 2 de outubro de 2025. Acisa Ribadeo celebrará a súa XI Gala Anual o vindeiro 19 de outubro. A cita servirá para conmemorar o seu 36 aniversario e para entregar varios galardóns: ao relevo xeracional, ao negocio emblemático, ao compromiso coa vida empresarial, a toda unha carreira e ao ribadense do ano.

A presidenta de Acisa, Carmen Cruzado, explicou que “na asemblea extraordinaria, que tivemos onte anunciamos a celebración da Gala Anual de Acisa Ribadeo. Consideramos importante esta cita, consolidada xa, como un punto de encontro entre o empresariado ribadense. Polo tanto, podemos xa anunciar oficialmente a celebración da XI Gala de Acisa Ribadeo – 36º Aniversario, que será o 19 de outubro. Deste xeito pretendemos reafirmar o noso compromiso coas nosas asociadas e asociados, os lazos empresariais, así como o intercambio de opinións, experiencias… por elo animamos a todo empresariado asociado e tamén ao non asociado a que poidan asistir e así compartir todos xuntos esta velada”.
Pola súa banda, Jesús Pérez, xerente de ACISA Ribadeo, contou que “a Gala terá lugar no Parador de Turismo ás 20:00 horas. O prezo da entrada será de 45 euros e as tarxetas poderán adquirise a partir do 3 de outubro, é dicir desde mañá, nas nosas oficinas situadas na rúa San Roque 57 – baixo”.

Cruzado Iglesias anunciou que “nesta XI Gala de Acisa Ribadeo esta directiva decidiu, non so entregar galardóns xa históricos se non engadir novas categorías, sendo nesta ocasión 5 as que entregaremos. En primeiro lugar, nunha categoría que estreamos o pasado ano, entregaremos o galardón en recoñecemento ao relevo xeracional a Josefa Abelleira Barreiro e César López Abelleira, que son nai e fillo, primeira e segundo propietarios de Gasolineira El Jardín / Gasóleos Abelleira, establecementos que seguen abertos grazas ao relevo xeracional familiar. En segundo lugar, acordamos conceder o galardón ao recoñecemento como negocio emblemático de Ribadeo, tamén creado o pasado ano, a Bis a Bis, en recoñecemento á súa traxectoria como local que fixo historia en Ribadeo, tras 40 anos de vida. Un novo galardón este ano é o de recoñecemento á vida empresarial, que recae en Juan Antonio Fernandez Andina, recentemente xubilado, polos seus anos á fronte de dous coñecidos negocios como foron Eureka Kids e R23 e especialmente a o seu compromiso como membro activo de Acisa Ribadeo e de varias das súas directivas. Un galardón histórico, como é e de recoñecemento a toda unha carreira, que este ano recae en María del Carmen Mon Bellón, pola súa xubilación, tras unha carreira profesional dedicada ao comercio local á fronte da súa histórica tenda Pequerrechos. E por último, concederemos o galardón como ribadense do ano ao xornalista Fabián Pérez Rego, pola súa traxectoria profesional en medios de comunicación estatais, por presumir de Ribadeo e ribadense aló por onde vai e pola súa boa disposición a colaborar coas iniciativas de promoción este municipio”.
Carmen Cruzado subliñou que “en Ribadeo hai máis negocios emblemáticos, hai máis relevo xeracional e hai máis persoas que poderían ser as ribadenses do ano. Neste 2025 eliximos estas e en vindeiras edicións serán outras as receptoras destes galardóns de Acisa, tal e como se veu facendo desde que celebramos a nosa Gala anual”.

Esta XI Gala Anual de Acisa Ribadeo conta co patrocinio principal de BeOne, así como de Gestión Gratelu, Talleres Cardi, Mariña Asesores, Limpezas lema, Iriarte Artes Gráficas, Kids & Us, Mariscos Ribadeo, Restaurante Marinero, Industrias Anel e Atleet Ribadeo. Ademais conta coa colaboración da Xunta de Galicia e do Concello de Ribadeo, do Parador de Ribadeo, de Aquí Diario e de Discosta Norte. “A todos eles queremos mostrarlles o noso profundo agradecemento, por colaborar con nos, e queremos amosar o noso agrado ao ver como tantas empresas creen no bo traballo e na boa imaxe de Acisa e están dispostos sempre a colaborar con nos. Moitas grazas a todas estas firmas polo seu apoio”, indicou Carmen Cruzado.