O PSdeG-PSOE do Vicedo destaca o compromiso da Deputación co municipio a través dun novo investimento nas estradas provinciais

O Vicedo, 3 de novembro de 2025. O PSdeG-PSOE do Vicedo celebra un novo investimento aprobado pola Deputación de Lugo para mellorar as estradas provinciais do municipio, unha actuación que reforza o compromiso da institución provincial co desenvolvemento das infraestruturas e coa seguridade viaria nas parroquias do concello.

A Xunta de Goberno da Deputación de Lugo deu luz verde este venres á adxudicación das obras de rehabilitación do firme nas vías LU-P-6401 e LU-P-6402, que conectan Suegos, Falcoeira, O Vicedo, Cruz da Pardiñeira e o Cristo de Portapena. O proxecto, que executará a empresa Carferlo S.L., supón un investimento de 328.092,42 euros (IVE incluído) e un prazo de execución de tres meses.

As actuacións realizaranse entre os puntos quilométricos 0+607 ao 3+240 na LU-P-6401, e 17+126 ao 19+299, ademais do ramal entre o 0+000 e o 1+164, na LU-P-6402.

Segundo subliñan desde o PSdeG do Vicedo, estas melloras “permitirán incrementar a seguridade e a calidade da circulación, beneficiando directamente ás veciñas e veciños das parroquias afectadas e de toda a municipalidade”.

A agrupación socialista agradece á Deputación de Lugo “o seu compromiso continuado co noso municipio e coa mellora das infraestruturas que vertebran o territorio”, destacando o papel determinante das políticas provinciais no mantemento das vías locais e no impulso á cohesión territorial.

“Esta actuación é unha mostra de que a cooperación entre administracións gobernadas polo Partido Socialista dá resultados reais para a veciñanza”, sinalan desde o grupo municipal, e conclúen que “a nosa maneira de facer oposición é traballando, con feitos e propostas útiles para O Vicedo”.