O eurodeputado socialista, Nicolás González Casares, reclama manter e reforzar o financiamento dos GALP

O eurodeputado galego comprométese a traballar para garantir a continuidade destes instrumentos clave para o emprego e a diversificación nas zonas costeiras

Bruxelas, 20 de marzo de 2026. O eurodeputado socialista galego, Nicolás González Casares, comprometeuse a defender que os Grupos de Acción Local Pesqueira e Acuícola (GALP) conten cun “papel forte e un orzamento á altura” no próximo marco financeiro comunitario 2028-2034.

Casares trasladou esta posición durante unha reunión mantida este xoves no Parlamento Europeo cunha representación dos GALP de España. No encontro, o eurodeputado galego e portavoz de Pesca da Delegación Socialista Española puxo en valor as iniciativas de desenvolvemento local participativo como un elemento crucial para o progreso das comunidades costeiras.

Precisamente por iso, manifestou o seu rexeitamento aos recortes orzamentarios propostos pola Comisión Europea, que poderían alcanzar ata dous terzos do financiamento actual, cualificándoos como “o maior recorte da proposta orzamentaria e da historia”.

Para Casares, este recorte evidencia “a falta de prioridade que esta Comisión outorga ao sector da pesca e da acuicultura”, así como un “profundo descoñecemento” do papel desempeñado polos grupos de acción local pesqueira na xeración de emprego e na diversificación económica das zonas costeiras.

Por iso, comprometeuse a “traballar para garantir a súa continuidade” no próximo marco financeiro, defendendo que estes grupos deben manter unha entidade propia e diferenciada.

Así mesmo, subliñou a necesidade de asegurar un financiamento suficiente e unha participación efectiva nas políticas de desenvolvemento das zonas costeiras, para que os GALP poidan seguir desenvolvendo “un labor indispensable para garantir a cohesión territorial, reducir desigualdades e impulsar o emprego e a actividade económica no litoral”.