Xove activa unha nova campaña de trampeo contra a vespa velutina

Xove, 20 de marzo, 2026. O Concello de Xove vén de poñer en marcha un ano máis a campaña de trampeo para a prevención da vespa velutina en todo o termo municipal.

Como en edicións anteriores, a empresa SERPA é a encargada de realizar tanto o trampeo como a monitorización e detección do avispón oriental ao longo dos 89 quilómetros cadrados do municipio, co obxectivo de garantir unha cobertura eficaz en todas as zonas e frear a expansión desta especie invasora. Desde o Concello lembran que levan polo menos seis anos aplicando tratamentos preventivos e accións de control para evitar a proliferación da vespa asiática.

A vespa velutina continúa a ser unha das principais ameazas para o sector apícola da zona, xa que ataca directamente ás abellas nos colmeares, reducindo de maneira significativa a produción e afectando aos ingresos dos apicultores locais.

Ademais, SERPA advertiu da posible chegada a Galicia de novas especies invasoras, xa detectadas no sur do Estado e que poderían avanzar cara ao norte. Por este motivo, e como complemento ao traballo habitual contra a velutina, desenvolverase en Xove un programa experimental de monitorización temperá para detectar a presenza destas novas especies —como Vespa orientalis ou Vespa bicolor— e actuar de forma preventiva.

Desde o Concello de Xove reiteran o seu compromiso coa protección do medio natural e co apoio ao sector apícola, clave tanto para a economía local como para a conservación da biodiversidade.