Trabada celebra unha multitudinaria VII Festa da Enfariñada con 750 racións servidas

Trabada, 4 de maio de 2026. A VII Festa da Enfariñada, celebrada este domingo en Trabada, volveu converterse nun éxito rotundo ao reunir a centos de persoas arredor da gastronomía e das tradicións locais. O alcalde, Rubén García, destacou a elevada participación e a consolidación desta cita como un dos eventos máis relevantes da Mariña lucense, con 750 racións servidas nas súas diferentes versións: tradicional, sen glute e a novidade deste ano, a enfariñada con bonito de Burela elaborada polo colectivo Ledicia.

A celebración contou tamén cun mercado de produtos locais e cun amplo programa musical que contribuíu a crear un ambiente festivo durante toda a xornada. García agradeceu de maneira especial a implicación da veciñanza e das persoas voluntarias que fixeron posible o desenvolvemento da festa, subliñando que “sen a súa colaboración non sería posible seguir facendo medrar esta celebración e manter viva a nosa tradición”.

A Presidenta da Deputación, Carmela López, participou tamén na festa acompañada do alcalde, de representantes municipais da contorna e da veciñanza. López salientou que a institución provincial achega 10.000 euros a esta iniciativa, “que é un exemplo do valor das nosas tradicións populares e da capacidade da xente de manter vivas as citas que forman parte da nosa identidade colectiva”.

A presidenta destacou ademais que a Enfariñada funciona como un elemento de identidade local que pon en valor o patrimonio cultural, reforza o tecido comunitario e contribúe á dinamización social e turística do concello. “Colaboramos coa Enfariñada respondendo ao noso compromiso co tecido asociativo e coas festas tradicionais, fundamentais para impulsar o equilibrio territorial da provincia”, engadiu.

A sétima edición da festa reafirma así o seu papel como un referente no calendario festivo da comarca, combinando tradición, gastronomía e participación cidadá.