Reunión do Concello de Viveiro co xefe provincial de Costas e empresas adxudicatarias para a realización de estudos no paseo marítimo

Viveiro, 10 de xuño de 2019. No día de hoxe, tivo lugar unha reunión entre a Alcaldía, o Xefe Provincial de Costas e os representantes das empresas que resultaron adxudicatarias de forma definitiva no procedemento levado a cabo por Costas para a realización dos estudos xeotécnicos do paseo marítimo e da baixada á praia de Sacido, que son PROYFE, no caso do paseo marítimo, e ICEACSA, para a baixada a Sacido.
Coa realización dos traballos referidos vaise estudar a estabilidade do paseo marítimo e do talud da baixada á praia de Sacido para coñecer cáles son as posibles solucións con respecto aos problemas existentes a día de hoxe, valorar os seus custes e decidir a actuación máis idónea para cada un destes dous espazos.
A realización destes dous estudos supón un paso moi importante para solventar os problemas de inestabilidade do paseo marítimo e da baixada á praia de Sacido, co obxectivo de poder executar as actuacións que corresponda á maior brevidade posible; ambos estudos son, polo tanto, esencias para poder facer as intervencións que se determinen.