A subdelegada do Goberno reivindica a igualdade con motivo da celebración do Día da Muller

 Lugo, 6 de marzo de 2020. A subdelegada do Goberno, Isabel Rodríguez, súmase á reivindicación da igualdade e os dereitos das mulleres que este ano centran o lema da ONU con motivo do Día Internacional da Muller, que se celebra o 8 de marzo.

Isabel Rodríguez encabezou hoxe o primeiro dos actos organizados pola Subdelegación do Goberno en Lugo para conmemorar esta data, no que deu lectura ao manifesto no que o Goberno de España asume o compromiso de erradicar todas as formas de discriminación que padecen as mulleres e expresa a firme vontade de loitar pola igualdade real entre mulleres e homes.

O manifesto lembra que “aínda que España está á vangarda internacional en canto á súa lexislación contra as violencias machistas ou pola igualdade entre mulleres e homes, as máis de mil mulleres asasinadas, dúas delas este ano na nosa provincia; as agresións sexuais, os datos económicos sobre desigualdade retributiva, a falta de corresponsabilidade nos coidados, ou as batallas que aínda han de librarse por alcanzar a igualdade real, evidencian que o noso país debe poñerse á altura das lexítimas e perentorias demandas das mulleres”.

“Por iso, o Goberno de España expresa o seu firme compromiso de erradicar todas as formas de discriminación que padecen as mulleres, garantindo unha aposta lexislativa valente e firme; e incorporando aos seus marcos normativos e de políticas públicas a Declaración e Plataforma de Acción de Beijing, así como os Obxectivos de Desenvolvemento Sostible da Axenda 2030 de Nacións Unidas.

Mediante esta Declaración Institucional, o Goberno de España expresa a súa firme vontade de loitar pola igualdade real e efectiva entre mulleres e homes, tanto dentro das nosas fronteiras como na súa proxección exterior”, conclúe.

Os actos conmemorativos organizados pola Subdelegación do Goberno continuarán o vindeiro mércores, día 11 de marzo, coa celebración dunha mesa de debate titulada “Mellora das condicións da muller no mercado de traballo”. Contará coa participación da maxistrada do Social Dalila Dopazo Blanco, o xefe provincial da Seguridade Social, Juan José Rodríguez Gude, a inspectora de Traballo e Seguridade Social Olalla Ferreiro-del Rey, e a representante da Asociación Executivas de Galicia, Mónica Álvarez. A ponencia terá lugar no salón de actos da Axencia Tributaria, ás 11 da mañá.

ROMPENDO ESTEREOTIPOS

A subdelegada interveu ademais, esta mañá, nun encontro con escolares do CEIP Paradai organizado con motivo da celebración do Día Internacional da Muller, no que tamén participou unha subinspectora da Policía Nacional.

Isabel Rodríguez eloxiou esta iniciativa da comunidade educativa deste centro escolar de Lugo pois considera que iniciativas coma esta serven de estímulo para a igualdade entre as mulleres e homes do futuro. Por iso, agradeceu o compromiso do profesorado na formación en igualdade de nenas e nenos.

Nesta actividade, celebrada esta mañá baixo o lema “Rompendo estereotipos”, a comunidade deste centro escolar reuniu a distintas mulleres para demostrarlle ao alumnado de infantil e primaria que o éxito profesional non está condicionado polo sexo e que as mulleres poden acceder a calquera posto que se propoñan.

Isabel Rodríguez compartiu as súas experiencias con alumnos de 3º, 4º, 5º e 6º de Primaria, xunto coa actriz Benedicta Sánchez, a conselleira de Educación, Carmen Pomar; Irene Cortiñas, a segunda muller xitana en acadar unha carreira universitaria, e Adiatarou Iglesias, campiona paraolímpica de atletismo.

Pola súa parte, a subinspectora da Policía Nacional Silvia Ribeira, reuniuse con alumnos de infantil e e de 1º e 2º de Primaria, xunto coa árbitra de fútbol Tania Fente, a arqueóloga Yolanda Álvarez, e a mecánica Mercedes Álvarez.

CO MUNDO DO TRABALLO

A subdelegada do Goberno tamén participará pola tarde no acto conmemorativo do Día Internacional da Muller que organiza en Lugo o sindicato UGT no que se fará unha homenaxe á sindicalista Ana María Abel Longarela.