Santiago de Compostela, 15 de Abril 2020.- A durísima crise económica e social que trae consigo a pandemia non vai superarse coas vellas receitas do liberalismo, -baseadas no binomio austeridade e recortes-, senón cunha aposta clara polo público, pola xustiza social e, no caso de Galiza, reforzando o autogoberno para actuar en clave de país.
Con esta diagnose, a portavoz nacional, Ana Pontón, presentou o comité asesor do BNG integrado expert@s en distintos eidos, como os ex reitores das Universidades da Coruña e Vigo, Xosé Luís Armesto e Salustiano Mato; os ex conselleiros de Medio Rural e de Industria, Alfredo Suárez Canal e Fernando Blanco; integrantes do ámbito académico e da investigación como María do Carmo García Negro, Edelmiro López Iglesias, Bernardo Valdés, Anxo Calvo, Ánxela Fernández, María Xosé Vázquez, Mar Pérez Fra ou María de la Fuente; e referentes sindicais como Xesús Seixo.
Este comité asesor está coordinado pola avogada Ester Vázquez e polo académico Xosé Manuel Carril, e ten como encomenda elaborar as liñas mestras dun plan de reactivación socioeconómico que o BNG vai propoñer á sociedade galega para superar o escenario de crise derivado do COVID19.
“Un programa pensado desde a nosa realidade e desde cinco principios: defensa do autogoberno e dun sector público potente como motor de desenvolvemento económico e garante da xustiza social; impulsar o tecido produtivo galego; aposta estratéxica pola ciencia e o coñecemento; fortalecer os servizos públicos, en particular a sanidade e os servizos sociais, e enfrontar as consecuencias do cambio climático”, explicou a portavoz do Bloque.
Non se pode repetir o fracaso do “sálvese quen poida” da crise de 2008, senón que hai que apostar polo público, por defender o colectivo e a xustiza social e por entender os servizos públicos como medios para garantir dereitos básicos e non como espazo de negocio e de lucro. “Se a crise financeira do 2008 tivo como resposta dos gobernos o rescate da banca, na crise do coronavirus de 2020 a resposta ten que ser o rescate da economía produtiva, dos traballadores e traballadoras, o rescate das persoas, da economía real e dos servizos públicos”, sintetizou Pontón.
Estratexia propia vs recentralización
“Se queremos enfrontar con éxito o desafío económico que deixa a crise,-insistiu a líder do BNG-, hai que reforzar o autogoberno, porque a solución aos problemas non vai vir de Madrid, nin dunha visión centralista do Estado, senón deseñando unha estratexia de futuro propia, unha resposta galega. Galiza ten que ser un país con máis capacidade para decidir sobre si, con máis capacidade para facer que os seus recursos creen riqueza e emprego no país e cun goberno forte que interveña con decisión para asegurar dereitos e servizos públicos á sociedade. Nesa liña imos traballar no BNG”.
Pontón tamén denunciou o “secuestro” do Parlamento por parte do xefe do Executivo quen, mentres “amordaza” ao poder lexislativo, utiliza a televisión pública para facer “partidismo cutre” no medio dunha pandemia cando debería ter unha posición de leal colaboración coas forzas parlamentarias para sumar propostas e medidas a favor do país.
Anomalía democrática
“É unha situación moi perigosa en termos democráticos que Feixóo teña o Parlamento confinado, secuestrado, sen permitir o labor democrático de control e de impulso de medidas na Cámara”, denuncia Pontón, quen considera “moi grave que no medio dunha pandemia o presidente da Xunta teña amordazado ao Parlamento e use os medios públicos como canle de propaganda, mentres ignora sistematicamente as propostas dos partidos políticos. Só un oportunista actúa deste xeito no medio dunha pandemia en lugar de facelo desde a colaboración”, salientou.
A líder nacionalista salienta que mentres mantén o Parlamento pechado e mesmo ten bloqueada a Deputación Permanente, Feixóo utiliza a TVG como gabinete de comunicación do PP: “pregúntome porque pode comparecer 16 veces na TVG nun mes, e só unha vez no Parlamento que é a sede da soberanía popular?”, interpela. A “nefasta” xestión das residencia é un dos asuntos que ten motivada a petición de comparecencia urxente do presidente do Goberno por parte do BNG.
Axilidade na xestión das axudas
Desde o Bloque tamén se pide ao Executivo “axilidade” para tramitar as axudas vinculadas aos ERTEs, en lugar de limitarse a botar balóns fora como se carecese de competencias, e insiste en reclamar da Xunta axudas directas para os e as traballadoras por conta propia, en concreto, un pago de 2.000 € con cargo aos orzamentos autonómicos, medida compatible coas postas en marcha polo Estado.
No ámbito educativo, o BNG aposta por facilitar a promoción de curso en todos os niveis do ensino e por avaliar ao estudantado unicamente polos contidos impartidos até o momento en que se suspenderon as clases presenciais, para evitar que a fenda tecnolóxica prexudique ao alumnado con menos recursos.
O actor e humorista continuará a súa xira pola comarca e presentará esta mesma proposta en Burela o venres 27 de marzo, ás 21:00 horas, na Casa da Cultura. O monólogo combina imaxes e historias, con contidos novos e outros xa coñecidos, sempre cun humor moi persoal. A función está recomendada para maiores de 14 anos e as entradas, a 5 euros, poderán adquirirse no despacho de billetes desde unha hora antes. O evento conta coa colaboración do Concello de Burela, a Xunta de Galicia, a Agadic e a Rede Galega de Teatros e Auditorios.
A Guía Repsol destaca 24 locais galegos como Soletes de primavera para gozar nesta Semana Santa. Galicia suma xa 357 establecementos recoñecidos con este distintivo, que non se renova nin se revalida, senón que se concede como categoría única. Na provincia de Lugo figuran seis Soletes: ‘Caserío Meiroi’ (Navia de Suarna), ‘Ebos’ (Vilalba), ‘Faragullas’ (Mondoñedo), ‘La Salina’ (Sarria), ‘Ramón’ (Lugo) e ‘Trespés’ (Monforte de Lemos).
López agradeceu á Academia Galega do Audiovisual por escoller Lugo e destacou a importancia do evento para visibilizar o talento local e o apoio provincial ao sector. A gala contou cunha ampla representación lucense: Nuno Pico e Xaime Miranda polo videoclip Antes fun moi malo; Fran Fórneas e Sergio Marey por Ferido do Xoán; Sabela Ramil e Andrea Mesa por Non cho podo dar; o dúo Fillas de Cassandra; e o burelés Breixo Llano, do equipo de Cos pés na terra. Ademais, a película Sirāt, do naviego Oliver Laxe, foi unha das grandes favoritas con 14
O acto institucional, celebrado este venres, contou coa participación da directora xeral de Igualdade do Principado e coa música de Clandestías.
Habilitarase o Rego das Flores. Desde o Concello recoméndase á cidadanía ter en conta esta incidencia nos seus desprazamentos mentres se manteña a restrición.
A cita celebrarase en Burela entre os días 4 e 6 de setembro, e xa están confirmadas preto dunha ducia de actuacións, entre elas as de Arume, Depedro, Éxtasis, Gara Durán, Juventude o La Milagrosa. O Goberno galego vén cooperando cos organizadores do festival, “que alcanza a súa duodécima edición consolidado como un motor de dinamización económica y cultural para a localidade”, afirmou Arias.
Será un concerto acústico e intimista, pensado para gozar da súa música nun formato próximo. Entrada libre ata completar aforo.
