Acisa Ribadeo levou a cabo máis de 30 campañas durante este ano. A asociación conta con 170 socios que recibiron, entre outras cousas, material gratuíto e asesoramento tras a chegada da pandemia do Covid

Foto de arquivo

Ribadeo, 28 de decembro de 2020. Acisa Ribadeo realiza balance da súa actividade durante 2020 na que salienta máis de trinta campañas, moitas postas en marcha tras a chegada da pandemia do covid-19. A asociación pechará este ano con 170 socios, que recibiron material gratuíto por mor da pandemia. Acisa xestionou máis de 100.000 euros en axudas recibidas das diferentes administracións.
O presidente de Acisa, Francisco Iriarte, declarou que “no contexto no que vivimos, a asociación intentou manter o seu normal funcionamento, tratando así de estar á altura das difíciles circunstancias actuais. Nestes meses probablemente temos cometido erros, pero sempre traballamos coa mellor intención, querendo ser útiles e ofrecer o mellor servizo”.
O xerente da asociación, Jesús Pérez, explicou que “realizamos máis de 30 campañas, sendo deste xeito o ano no que máis actividade tivemos. Merecen especial mención, a entrega de materiais de protección gratuítos, repartimos decenas de miles de mascarillas, centos de botes de xel hidroalcohólico, así como toda a cartelería derivada do covid-19. Ademais á posta en marcha das campañas habituais, engadimos outras como Pensando en ti, coa que promocionamos Ribadeo durante o verán, Listos para a túa volta, coa que potenciamos as compras e o consumo no mes de setembro. Tamén con ese fin desenvolvemos o Domingueo, Somos de bares e Rasca e gaña, sen esquecer unha iniciativa moi importante, como cremos que foi a creación do selo de calidade Ribadeo Seguro”.
Iriarte Quintana subliñou “tamén a realización dos compromisos adquiridos na última asemblea como a creación das marcas Villa Marinera de Rinlo e Barrio Marinero de Porcillán, que esperemos poidamos utilizar este próximo ano para fomentar a imaxe turística e gastronómica de ambos lugares e ás que, se todo vai ben, se unirán dúas novas denominacións, xunto coa marca Ribadeo no Camiño, presentada recentemente, e que esperamos teña un gran protagonismo durante o próximo ano”.
Pérez Prada seguiu a relatar: “mantendo o noso compromiso pola promoción individualizada, a dixitalización e a modernización dos socios, puxemos en marcha a app e a plataforma de venda online Ribadeo cerca de ti, creando así novas oportunidades de venda online para quen ata agora non a tiña e reforzando a aqueles que si contaban con esa opción”.
O presidente de Acisa lembrou que “na aposta polo aforro de custes empresariais, temos firmado varios convenios de colaboración que melloran os servizos dos nosos socios, como o transporte, a luz, o teléfono, de comisións bancarias ou para a conciliación familiar. Nesta liña, queremos destacar tamén a entrega de outros materiais como son as bolsas, pegatinas ou papel de regalo gratuíto para este Nadal. Todo isto cremos que suma un valor moi importante e aforra custes empresariais. Outra das prioridades foi a información actualizada e permanente sobre os cambios normativos e axudas durante o confinamento, cun servizo 24 horas todos os días da semana, así como das axudas que se seguen publicando. Tamén exercemos, da mellor maneira que sabemos a nosa función de representatividade, solicitando medidas e axudas específicas directas aos empresarios. Exemplo disto foron as peticións feitas por Acisa para a ampliación de terrazas e o relativo aos cobros de impostos, así como ter conseguido que se celebren actividades, tan importantes para a nosa economía, como a campaña das panchas, na que a nosa asociación xoga un papel fundamental”.
O xerente de Acisa engadiu que “toda esta actividade se mostra en datos como que, preto do peche do ano, contamos con 170 socios, 19 altas no que vai de ano e 8 baixas das que sete temos que lamentar que foron por peche. Economicamente deixamos de ingresar uns 20.000 euros coas cotas canceladas por mor da pandemia, e tivemos que aumentar moito máis do previsto o noso gasto para dar a cobertura necesaria aos socios. Puidemos facer fronte a estas actuacións grazas ás axudas das administracións, así recibimos en diferentes subvencións da Xunta de Galicia uns 80.000 euros (65.000 que xestionamos nós e 15.000 de tramitación directa por parte da administración galega), do Concello de Ribadeo 24.000 euros e da Deputación de Lugo 6.000 euros. A estas cifras temos que sumar os 57.000 euros das panchas, que Acisa xestiona integramente, xa que nosoutros recibimos eses fondos do Concello de Ribadeo para que, despois de todo o proceso de validacións que Acisa fai cos establecementos participantes, se poidan converter as panchas en euros. Presentaremos o balance económico final na asemblea, como todos os anos, e aínda que é cedo para facelo, estamos falando probablemente dun dos anos con máis gasto, case duplicando o previsto a principios de 2020 e cuns ingresos moi destacables, aínda que un pouco máis baixos debido ás cotas non cobradas, o que nos deixará un balance económico cun déficit controlado similar ao do ano pasado. A nosa intención é celebrar a nosa asemblea anual cara o final do terceiro trimestre de 2021, pero dependerá de cómo se atope a situación sanitaria nese momento”.
Francisco Iriarte concluíu dicindo: “quero desexarlles a todos os ribadenses, especialmente aos empresarios e traballadores do noso comercio, da nosa hostalería e dos nosos servizos, así como ás súas familias, un próspero 2021, cheo de forzas para superarnos, que poidamos todos volver abrir as portas dos nosos negocios e recibir de novo aos nosos veciños e visitantes. Non nos conformemos, non nos rendamos e sigamos traballando día a día polos nosos negocios. Nosoutros seguiremos facendo esa labor por Acisa e por Ribadeo”.