Barreiros, 25 de novembro, 2021. Secundando o lema da Marcha Mundial das Mulleres: “Combater a xustiza patriarcal para acabar coa violencia machista”, puxemos voz a un manifesto para sinalar que o feminismo galego se manterá firme apuntando aos culpábeis, xa sexa por acción, por omisión ou por complicidade.
Visibilizamos a violencia e desprotección que sufren as mulleres do caso Maruxaina en cada unha das intervencións que permiten que os corpos das mulleres sexan gravados por terceiros sen consentimento e que as imaxes se empreguen con fines sexuais impunemente.
Puxemos sobre a mesa a flagrante brutalidade que consinte a obxección de conciencia na sanidade pública, obrigando a que as mulleres galegas teñamos que desprazarnos fóra de Galiza a interromper o embarazo.
Reclamamos que as institucións deben ser unha ferramenta de cambio e non apeiros que perpetúen desigualdades e violencias contra as mulleres.
Na concentración interpretamos o tema “Sempre Viva” de Rebeca Lane, versionado ao galego polo colectivo feminista, que pode verse na canle de YouTube de MeigasBravas