Nostalxia do Carme

Toda celebración entrañable ten un compoñente de saudade que fai que a festa se viva con sabor agredoce, ó mesturarse a ledicia do acontecemento cos sentimentos que afloran marcados, sobre todo, por irreparables e dorosas ausencias: diso saben moito as xentes dos nosos pobos de mar, onde tantos homes perderon a vida e dos que moitos nen sequera se recuperaron os corpos.. As características propias da actividade mariñeira e o alto risco da mesma e, polo tanto, as tráxicas vivencias ó longo dos tempos, fan que as festas do Carme resulten emotivas e nostálxicas. O mar de Foz rexistra como a súa maior traxedia a acontecida ó remate das festas do Carme de 1945 cando o “Jesús Nazareno”, que voltaba a faenar á captura do bonito, naufragou e pereceron os seus doce tripulantes. O escritor e xornalista, don Xosé Trapero Pardo publicaba en El Progreso, o día 20, un reportaxe que comezaba así: “El bello pueblecito costero, al que defienden de los embates del mar los islotes y acantilados del Campo de Ramos y la avanzadilla de la Pena do Escairo, vivió una vez más horas de tragedia, porque el Cantábrico, que en vano intenta cerrar el paso a los marineros de Foz con el peligro perenne, pero siempre nuevo, de la “barra”, se cobró su tributo, millas adentro, en horas angustiosas de galerna. Y el mar, guardador celoso de tantos secretos trágicos, guarda hoy el de la desaparición de la embarcación. En el Campo de Foz – cuadrilátero que agrupa las viviendas de los pescadores – se esperó en vano el retorno de la lancha y de sus hombres. Pero el “Jesús Nazareno” no podía ver ya los guiños de los faros de Tapia, Vares, San Ciprián, Ribadeo. Y hubo en el pueblecito  pesquero llanto en los ojos y duelo en las almas…“ Foz quedou, naqueles tempos miserentos, asolagado de tristeza. Por moitos anos a traxedia, coa morte de doce focegos populares e queridos, que deixaban unha longa ristra de viuvas, fillos, noivas, familiares e amigos, pesou como unha lousa na nosa sociedade. Hai do sucedido xusto 65 anos. Unha rúa, pretiño da “Riveira”, perpetúa o  recordo. Felices festas do Carme.

Suso Fernández