Os mariñaos adiantáronse por mediación de Malaguti, pero foron a remolque durante boa parte da segunda metade e acabaron perdendo cun penalti moi rigoroso a favor do Melistar Futsal no treito final
Burela, 14 de outubro, 2023. O conxunto masculino do Pescados Rubén Burela segue sen carburar a domicilio e suma a súa segunda derrota lonxe da Mariña tras caer na visita ao Melistar Futsal (4-3), un recén ascendido que lle puxo moi difíciles as cousas aos discípulos de David Rial.
O duelo entre burelistas e norteafricanos foi moi igualado e aos dous conxuntos custoulles impoñer o seu xogo, aínda que empezou algo mellor o Pescados Rubén, que se adiantou no minuto 9 cunha gran volea de Malaguti á saída dun saque de banda. O benaventano pegoulle con todo e Gonzalo Puebla, aínda que tocou o balón, non puido desvialo o suficiente para evitar o tanto.
Responderon a catro do intervalo os melillenses, que aos poucos gañaran presenza preto da meta de Kaluza. Unha gran acción de Vitinho pola á esquerda remataba cunha parede con Nico Rolón que non podía rematar no corazón da área, pero quedáballe franca a Spellanzon para bater ao meta polaco. Non se volvería a mover o electrónico ata o segundo tempo.
Nos últimos 20 minutos, os pícaros foron durante moitos minutos por detrás, ata consumar a súa terceira derrota da presente campaña. O Melistar poñíase por diante por primeira vez grazas a un disparo cruzado desde o costado esquerdo de Wallace que sorprendía a Kaluza. Respondía ao pouco tempo Ismael, aproveitando a inferioridade norteafricana pola expulsión de Nico Rolón.
Con todo, as sensacións dos mariñáns seguían sendo non demasiado boas e Iván Fernández, tras unha perda de Flethes, batía a Kaluza cun disparo que se coaba pola escadra. De novo volvía poñerse por detrás o Pescados Rubén e agora era Lucho o que igualaba no minuto 32 ao recoller na área o rexeite dun disparo de Ismael.
Co partido sen dono, o Melistar pescaba a vitoria nunha acción na que os colexiados sinalaban penalti de Ismael nun agarrón máis que livián. Spellanzon non perdoaba diante de Kaluza e o Burela tentou rabuñar polo menos un punto con Ismael, primeiro, e Lucho, despois, como porteiros-xogadores. Tiveron os de David Rial dúas boas ocasións en superioridade, pero os remates de Lucho e Malaguti nos últimos 20 segundos fóronse ás nubes.
Ficha Técnica Melistar Futsal 4-3 Pescados Rubén Burela FS
Melistar Futsal (4): Gonzalo Puebla; Javi Sánchez, Osawa, Claudio, Wallace -quinteto inicial-, Nico Rolón, Nacho Gil, Pablo González, Spellanzon, Iván Fernández e Vitinho.
Pescados Rubén Burela FS (3): Kaluza; Isma, Charly, Álex García, Malaguti, -quinteto inicial-, Ismael, Flethes, Alberto Mirás, Lucho, Nico Rosental e Mika (ps).
Goles: 0-1, min 9: Malaguti. , 1-1, min. 16: Spellanzon. 2-1, min. 25: Wallace. 2-2, min. 27: Ismael. 3-2, min. 30: Iván Fernández. 3-3, min. 33: Lucho. 4-3, min. 38: Spellanzon, de penalti.
Árbitros: Cañas Mañas e Quintero Carrión (Castilla y León e Andalucía). Expulsaron por dobre amarela no minuto 26 ao local Nico Rolón. Tamén amonestaron aos melillenses Pablo González, Yiyo (ps), Osawa, Spellanzon, e Wallace, así como aos visitantes Charly e Malaguti
Inicidencias: Encontro da Segunda División de fútbol sala disputado no pavillón Javier Imbroda de Melilla.
A proba, organizada polo CP Altrúan, reuniu máis de 130 palistas dos seis clubs lucenses de augas tranquilas que participan na competición: o propio Altruán, o CD San Ciprián, o Club Kayak Foz, o CP Viveiro Urban Hotel, o Cidade de Lugo e o Club Fluvial de Lugo. O deputado de Mocidade Daniel García entregou os premios da proba, na que Club Fluvial de Lugo, Cidade de Lugo e Altruán coparon o podio por equipos. A Copa Deputación de Piraguismo, que conta de 6 regatas, organízase no marco da colaboración que a Vicepresidencia da Deputación de Lugo mantén coa Federación Galega de Piragüismo para a promoción deste deporte, ofrecendo aos clubs a posibilidade de participar en competicións federadas nas súas comarcas e contribuíndo así á consolidación de equipos de base.
Malia a intensa calor, o pavillón encheuse de público para gozar das actuacións das numerosas alumnas, que ofreceron exercicios individuais, por parellas e en grupo, destacando pola súa beleza e dificultade técnica ao ritmo da música escollida. Ao remate, a concelleira Ana Rubal entregou medallas ás participantes, que tamén agradeceron o traballo e os valores transmitidos pola súa monitora, Lorena Fernández. Lémbrase que a festa de clausura das Escolas Deportivas terá lugar o luns 29 ás 19:00 horas, nun acto conxunto co Concello de Alfoz, no que haberá diversas actividades de celebración e a entrega de diplomas.
A cantante e instrumentista asturiana Mónica Acevedo actuará en formato solista, mentres que o equipo do local ofrecerá un menú especial con pratos como o tartar de xarda, gañador do “Ribadeo Sabe”, gazpachuelo de tempada, lomo de sardiña con berenxena afumada, cóctel de lagostinos, bonito de Burela con melocotón asado e sopa de cebola, e solombo de porco celta con xudías tenras. A cita comeza ás 21:15, con prazas limitadas e reserva imprescindible.
A xornada incluíu tamén o IV Torneo de Pádel, que continuará durante a fin de semana. O evento, organizado polo Concello xunto con ASAPA e Miño Vivo e coa colaboración da Xunta, recupera unha iniciativa nacida hai catro anos a petición da mocidade, coa intención de consolidala no tempo. O tenente de alcalde, Marcos García Lombardero, destacou a alta participación —catro veces maior ca na primeira edición— e agradeceu a implicación de entidades, colaboradores e asistentes, así como a presenza de representantes da Xunta, do Parlamento e da Deputación.
Adultos, nenos, familias, grupos de amizades fixeron o percorrido nun día espectacular de sol e cunha temperatura de 26º á hora da saída. Acudiron á cita o presidente provincial da AECC, José Manuel Rozas, o alcalde de Ribadeo, Dani Vega, as concelleiras e concelleiro ribadenses, Marta Saiz, Begoña Sanjurjo, Elena Sierra e Francisco José Silvent, a presidenta e o xerente de Acisa, Carmen Cruzado e Jesús Pérez, así como representantes da AECC de Ribadeo coa súa presidenta, Tea Martínez, á cabeza. A II Andaina Ribadeo en marcha contra o cancro contou co patrocinio de Solán e Acisa Ribadeo e coa colaboración do Concello de Ribadeo, Eroski e 2M.
A partir das 19:45 horas abrirán a xornada o Cuarteto Illa Pancha e Tradigalu, mentres que desde as 20:00 horas se poderán degustar hamburguesas á parrilla, bocadillos de panceta e chourizos asados. Xa pola noite, ás 21:30, tomarán o relevo Mi Rollo es el Rock, antes da tradicional fogueira de San Xoán, prevista para as 00:00 horas. A celebración, organizada por A Rebolaxe coa colaboración do Concello de Cervo e a Deputación de Lugo, inclúe tamén o sorteo dunha paleta de cocho e contará con aparcamento habilitado no Estanco da Praia do Torno.
Pasada a medianoite, un vehículo saíuse da vía na N-634. Como consecuencia do impacto, tres persoas resultaron feridas. Da asistencia sanitaria ocupáronse os profesionais de Urxencias Sanitarias de Galicia-061 e os axentes da Garda Civil de Tráfico da seguridade na vía. Os Bombeiros de Barreiros tamén acudiron, sen embargo, ningún dos feridos estaba atrapado.
