Ribadeo conta por primeira vez cunha subvención de 50.000 euros da dirección xeral de Comercio, que irá destinada en parte á nova campaña da Pancha

Ribadeo, 31 de xullo de 2024. Hoxe tivo lugar unha xuntanza da mesa local de comercio con asistencia, por vídeo conferencia, do director xeral de Comercio, Gabriel Alén. Entre os asuntos abordados figuran a achega de 9.500 euros que recibirán os praceiros da praza de abastos de Ribadeo así coma o convenio por importe de 50.000 euros subscrito entre o Concello e a Dirección Xeral de Comercio, que irá destinado en parte á nova campaña da Pancha, a moeda local de Ribadeo.

O alcalde, Dani Vega, contou que “hoxe tivo lugar a Mesa Local de Comercio, na que participamos como goberno, tamén membros da oposición, Acisa e, por primeira vez, tamén participou o director xeral de Comercio.Eu creo que é moi importante ter estas reunións. Evidentemente apróbanse certas cuestións que van na orde do día, pero aparte diso fálase de cousas fundamentais para o futuro”.

O rexedor explicou que “nesa Mesa Local de Comercio concretouse en primeiro lugar unha axuda de 9.500 euros para os praceiros da Praza de Abastos. E partir de aí tamén vai haber unha solicitude dunha subvención por parte do Concello para ir preparando e modernizando a nosa Praza de Abastos”.

Vega subliñou que “en segundo lugar concretouse o convenio de colaboración entre a Dirección Xeral de Comercio, da Xunta de Galicia, e o Concello de Ribadeo, de 50.000 euros. Aí vamos empezar, como xa se aprobou no pleno da corporación municipal anterior, esa colaboración para o incremento no orzamento da Pancha; pasamos de 65.000 a 85.000 euros de presuposto. Polo tanto é un incremento de 20.000 euros, que todos os veciños e visitantes, todos aqueles que consuman e compren no comercio local van ter máis axuda que en anos anteriores. E tamén con ese orzamento de 50.000 euros vamos traballar na dixitalización e na dinamización do comercio”.

O alcalde fixo unha valoración positivo desta xornada de traballo: “polo tanto foi unha reunión produtiva, na que tamén falamos de cousas estratéxicas para o futuro, como é o comercio de calidade; as prazas de abastos, que tamén están nesa estratexia de excelencia de produtos e de traballo e profesionalización. Polo tanto, unha reunión positiva na que resaltamos ese primeiro convenio coa Xunta de Galicia en comercio de 50.000 euros. E a partir de aí seguiremos traballando e xestionando”.