“O PP minte sobre servizos sociais en Burela”, afirma o BNG

Burela,10 de setembro, 2025. O BNG responde ás críticas formuladas polo Partido Popular en materia de política social

“En primeiro lugar, os datos de gasto social por habitante aos que fai referencia o PP corresponden ao ano 2023, en concreto á diferencia entre os anos 22 e 23, xusto á chegada do BNG ó goberno local. Cómpre lembrar que os dous concellos da Mariña que se sitúan por debaixo de Burela nese ranking son precisamente gobernados polo Partido Popular: Cervo e Ribadeo”.

Ademais, Sandra Fernández Cillero, concelleira de Servizos Sociais e Igualdade do Concello de Burela recorda que “o 1 de febreiro de 2024, en pleno período de campaña electoral autonómica, o portavoz do PP de Burela anunciou no salón de plenos que a Xunta de Galicia incrementaría nun 15% a achega para o Servizo de Axuda no Fogar, pasando de 12 a 14 euros por hora. A día de hoxe seguimos agardando esa suba, que sería positiva pero insuficiente para cubrir as necesidades reais das familias usuarias e para mellorar as condicións das traballadoras do SAF”.

Cómpre remarcar ademais que o Servizo de Axuda no Fogar é de competencia autonómica, pero a Xunta decidiu desprenderse desa responsabilidade e trasladala aos concellos. Para Fernández “isto supón que os concellos teñen que facer fronte a graves dificultades tanto na contratación do persoal como no financiamento do custo real do servizo, que está moi por riba da achega que realiza a Xunta”.

Ademais, o Concello de Burela realiza un importante esforzo económico asumindo servizos
impropios, que deberían estar financiados e xestionados pola Xunta. Engade a concelleira do BNG Sandra Fernández que “é o caso da Unidade de Atención Temperá, pioneira na Mariña, que dá cobertura a oito concellos da comarca, ou da Unidade de Drogodependencias, que tamén presta servizo a nivel comarcal. Estes dous exemplos amosan con claridade o compromiso real deste Concello co benestar das persoas, mesmo asumindo competencias que non lle corresponden”.

Por todo isto, “rexeitamos unhas declaracións que só buscan crear confusión e restar valor ao traballo que se fai desde o ámbito municipal”. Remata Sandra Fernández dicindo que “o BNG de Burela seguirá a apostar polos servizos sociais, pola igualdade e polo apoio ás familias, malia que a Xunta de Galicia continúa sen asumir as súas responsabilidades neste eido”.

Os nacionalistas pídenlle respecto ós populares co tecido asociativo e a veciñanza

O grupo municipal do BNG está moi sorprendido coas declaracións e a actitude dos populares de Burela nas últimas datas. “Non se entende como se pode tentar desprestixiar así á nosa vila e a un colectivo que traballa de forma desinteresada dende fai moitos anos por achegarnos un fin de semana único, un festival que é do mellor de Galiza sobre todo en canto a respecto, bo ambiente e inclusión. A veciñanza de Burela non sufriu absolutamente ningún trastorno senón que está encantada co Osa do Mar e con Fanto Fantini porque nos representan a todxs e porque colaboran moito con todo o tecido asociativo.” destacou o voceiro Mario Pillado.

Continuou Pillado decindo que “para nós sería un pracer poder traballar da man do Partido Popular para algunhas das nosas demandas, como que a Xunta asuma as súas competencias en canto a Servizo de Axuda no Fogar, a Unidade Asistencial de Drogodependencias ou a Unidade de Atención Temperá e que o faga cun convenio co goberno central para rehabilitar a antiga “Casa do Mar” para crear un gran centro de servizos sociais en Burela. Pero supoño que se en Febreiro de 2024 cando poideron votar a favor dunha iniciativa nosa que recollía todo isto o fixeron en contra xa se estaban posicionando, non contra o BNG de Burela senón contra Burela en xeral, como fan habitualmente; unha mágoa”