O goberno municipal detalla as actuacións realizadas en Fazouro tras as críticas do PP

Foz, 16 de marzo de 2026. A voceira do goberno municipal, a socialista Inés López Couto, explica que “a oposición debera facer con máis seriedade as súas demandas, cando sabe que o responsable dos mantementos da costa é a demarcación de Costas do Estado e non o Concello. Só o fai por manter a súa oposición destrutiva. Este goberno xa reclamou que se retirara todo o material que se acumula na desembocadura do Ouro. A maiores temos que recordarlle que no inicio do noso primeiro mandato o paseo marítimo en Fazouro, nesa mesma zona pola marxe esquerda desde a Ponte de Ferro ata a depuradora, estaba cortado e o señor Castiñeira non fixera absolutamente nada. O Concello de Foz cos seus propios fondos e coa solicitude debida dos permisos fixo unha nova escollera de protección (cun investimento de 32.181,18 euros) e repuxo o paseo marítimo que el deixara abandonado. Do mesmo xeito que coas reclamacións deste goberno se fixo o paseo de 1,5 quilómetros de Fazouro a Peizás ou se arranxou o frontal da Praia da Pampillosa ou igual que renovamos o alumeado na área recreativa da Ponte de Ferro. Que obras se fixeron durante o seu mandato nesa zona? Non lembramos ningunha”.

Inés López Couto engade que “o voceiro do Partido Popular parece que espertou da hibernación e é curioso que o señor Castiñeira manteña unha continua provocación nos medios de comunicación, agora que anunciou o fin da súa etapa política en Foz. Parece que dende que se botou a un lado está máis traballador de repente, quizais agora ten remordementos de todo o que non traballou cando puido facelo”.