Os socialistas acusan á Xunta de anos de discriminación institucional con Viveiro

Viveiro, 4 de agosto, 2026. O Grupo Municipal Socialista de Viveiro considera que o anuncio da Xunta de Galicia sobre o investimento no Teatro Pastor Díaz volve evidenciar o trato discriminatorio que, segundo denuncian, o Goberno galego mantivo durante anos co Concello de Viveiro mentres o Partido Socialista estaba á fronte da alcaldía.

A portavoz socialista e exalcaldesa, María Loureiro, afirma que “esta é unha boa noticia para Viveiro e, por suposto, alegrámonos de que por fin chegue este investimento. O Teatro Pastor Díaz é un dos grandes referentes culturais da nosa cidade e sempre defendemos que merecía o apoio doutras administracións. O que non podemos esquecer é que durante os nosos gobernos todas as peticións de subvencións e investimentos para este edificio foron rexeitadas pola Xunta”.

Para Loureiro, “o anuncio do Teatro Pastor Díaz non é un feito illado. É un exemplo máis dunha forma de actuar que os veciños e veciñas de Viveiro sufriron durante anos. Todo aquilo que o Concello solicitaba á Xunta atopaba un ‘non’ por resposta”.

A portavoz lembra que esta situación se repetiu en numerosos proxectos estratéxicos para o municipio: “Pasou co Teatro Pastor Díaz, pasou co Plan Xeral —bloqueado durante anos e agora axilizado—; pasou co peirao, onde se nos negaban actuacións que hoxe si se anuncian; pasou co saneamento de Magazos e Landrove, co arranxo do Muelle de Viveiro; e tamén coa rotonda da Misericordia, para a que deixamos preparado o proxecto e sempre se nos dicía que non había investimento”.

Loureiro insiste en que “non nos estaban vetando a min nin ao Grupo Municipal Socialista. Estaban vetando ao Concello de Viveiro e, sobre todo, aos seus veciños e veciñas. Iso é o realmente grave. O tempo acabou demostrando que o problema nunca foron os proxectos, porque moitos deles son precisamente os que agora se están executando ou anunciando”.

Tamén lembra que durante boa parte dese período a actual alcaldesa ocupou responsabilidades na Xunta como delegada territorial: “É evidente que Viveiro non recibiu o trato que merecía. Hoxe anúncianse actuacións que durante anos se nos negaron de maneira sistemática”.

Desde o Grupo Municipal Socialista subliñan que, a pesar de todo, sempre apoiarán calquera investimento beneficioso para Viveiro: “Queremos que a Viveiro lle vaia ben, esteamos gobernando ou na oposición. Nunca confundiremos os intereses do noso concello cos intereses partidistas”.

Loureiro contrapón esta forma de actuar coa da presidenta da Deputación de Lugo, Carmela López Moreno, baseada na colaboración institucional: “Como vén dicindo a presidenta, colaboramos cos 67 concellos da provincia sen importar a súa cor política; o único criterio é mellorar a calidade de vida das veciñas e veciños e apoiar proxectos que xeran oportunidades para todo o territorio”.

A portavoz destaca que “hoxe mesmo temos a mellor proba: a Deputación e o Concello de Viveiro asinan o convenio para rehabilitar a antiga Pescadería cunha achega extraordinaria de 248.000 euros. Ese investimento chega porque é bo para Viveiro, non porque goberne un partido ou outro. Esa é a diferenza entre unha maneira de facer política e outra”.

María Loureiro conclúe afirmando que “poden apartarnos do goberno, pero nunca van conseguir que deixemos de defender os intereses de Viveiro. Sempre nos alegraremos de cada investimento que chegue ao noso concello. E tamén denunciaremos cando quede demostrado que durante anos a Xunta tratou a Viveiro de forma distinta simplemente porque gobernaba o Partido Socialista. Iso non foi un castigo para min nin para o PSOE; foi un castigo para todos os veciños e veciñas de Viveiro”.