O PSOE de Viveiro esixe ao Goberno local a retirada inmediata dos residuos que permanecen en Naseiro un mes despois da festa

Viveiro, 22 de setembro, 2026. O Grupo Municipal Socialista reclama ao Goberno local do Partido Popular que ordene a retirada inmediata dos materiais e residuos que continúan na contorna de Naseiro.

O PSOE de Viveiro denuncia o estado de abandono que presentan os campos de Naseiro aproximadamente un mes despois da celebración da tradicional festa, onde aínda permanecen numerosos enseres e materiais pendentes de recollida.

As fotografías achegadas polo Grupo Socialista permiten comprobar a existencia de sofás, colchóns, mobiliario, estruturas, materiais de montaxe e outros voluminosos, tanto nos propios campos como en diferentes puntos da contorna. Algúns destes elementos están directamente sobre o terreo e outros acumúlanse nas proximidades dos colectores.

Desde o PSOE consideran inaceptable que, transcorrido un mes desde a celebración, os campos de Naseiro continúen nesta situación.

“Falamos dun espazo que acolle unha das celebracións máis importantes de Viveiro e que, unha vez rematada a festa, debería quedar correctamente acondicionado e limpo. Non entendemos que despois de varias semanas aínda teñamos que atoparnos con colchóns, sofás, mobiliario e todo tipo de enseres abandonados”, sinalan.

O Grupo Socialista lembra que a limpeza e a retirada de residuos e voluminosos forman parte dos servizos que debe prestar o Concello e están incluídos no contrato de recollida de lixo e limpeza. Por iso, consideran que o equipo de goberno debe explicar por que non se completou esta actuación e, sobre todo, proceder á súa solución inmediata.

A situación está a xerar tamén queixas entre veciños e veciñas da contorna, incluídas persoas das zonas de San Pedro e Chavín, que trasladaron ao PSOE o seu malestar polo estado no que continúa este espazo.

“Non estamos reclamando nada extraordinario. Pedimos que, despois dun evento deste tamaño e unha vez transcorrido un mes, se retire o material que xa non ten utilidade e se deixe a zona nas condicións que lle corresponden, como se fixo sempre”, engaden.

O PSOE considera especialmente preocupante que parte destes materiais permanezan ao aire libre e nas proximidades de zonas de vexetación, ademais do perigo que supoñen elementos cortantes ou rotos, como faros de coches.

Por este motivo, o Grupo Municipal Socialista presenta no Concello un rogo para instar ao equipo de goberno a actuar coa maior brevidade posible e ordenar a retirada de todos os enseres, voluminosos e materiais que aínda permanecen nos campos de Naseiro e na súa contorna.

“Un mes é tempo máis que suficiente para que os campos de Naseiro estean completamente limpos. O que pedimos ao Goberno municipal do Partido Popular é simplemente que cumpra coas súas obrigas e dea resposta ás reclamacións dos veciños”, conclúen.