O momento político que vive Asturias é moi interesante. Estabamos acostumados ao dominio socialista, cunha pequena cuña introducida por IU (indispensábel agora para garantir o goberno) e un acomodado PP que, baixo o paraugas do gabinismo, secuestra as súas posibilidades de futuro a maior gloria de Gabino de Lorenzo (alcaldísimo de Uviéu).
O PSOE gobernou a autonomía asturiana desde 1983. A sensación de esgotamento político e falta de ideas agromou a mediados dos 90 e rematou cristalizando no goberno de Sergio Marqués (inicialmente PP). Pero a dereita asturiana non soubo aproveitar a oportunidade que lle brindara o pobo asturiano. É máis, rematou a lexislatura cunha escisión que levaría ao presidente do aquel entón goberno conservador asturiano a fundar a URAS. Mais o intento de consolidar un partido rexionalista asturiano acabou esmorecendo.
Non sen vencer moitas reticencias do SOMA, en 1999 Vicente Álvarez Areces logra recuperar o poder para o socialismo asturiano. Outra vez comezou un ciclo que pasou pola maioría absoluta, o goberno en minoría e a coalición con IU. Actualmente, cunha situación case agónica, a parálise institucional é considerábel. Apenas hai iniciativa. Tan só a leve esperanza dun novo candidato socialista, Javier Fernández, este si avalado polo SOMA, parecía dar algúns folgos ao PSOE asturiano. Pero todo apuntaba a que unha vez máis, e tras moitos anos, chegaba o momento do PP.
Porén, polo que se ve, Francisco Álvarez Cascos e Gabino de Lorenzo, son moito galo xunto para compartiren o mesmo curral. Non pretendemos dar nin quitar razóns a un nin a outro. Paco Cascos sempre se gababa de ser o general secretario. O referido Sergio Marqués foi unha vítima política súa. Agora tócalle a Cascos tomar o aceite de ricino. Atragoarase?
┴lvarez Cascos aceptou o reto de capitanear unha proposta alternativa aos partidos políticos consolidados en Asturias: Foro Asturias. Parte de cero no ideolóxico? Ten algunha tradición á que acollerse? Cómpre remontarse ao movemento ilustrado. Non podemos falar de postulados nacionalistas no século das Luces, pero si dun agromar de certo sentimento asturianista. Xovellanos ten o firme propósito de crear a “Academia de les Buenes Lletres Asturianes”. A “Colección de poesías en dialecto asturiano” (1830) de Xosé Caveda y Nava é un claro exemplo de aposta polo estudio da cultura tradicional asturiana. Tamén se defenderán as institucións políticas rexionais e demandarase autonomía e proteccionismo económico.
Pero Asturias viu morrer o programa romántico nacente en Xuan María Acebal. Dito programa estaba moi vinculado a sectores conservadores da sociedade asturiana, ao carlismo, que en Asturias vaise ver totalmente desprazado por unha industrialización cada vez máis puxante. O capital foráneo investido na economía asturiana asentarase sobre unha ideoloxía liberal. E o proletariado que vai xurdindo á sombra desta dinámica económica abrazarase ás ideas socialistas, coas que dará resposta ao gran capital e a súa dinámica industrial.
Aínda que mantendo un discurso internacionalista, o proletariado vai comportarse, en certo xeito, como unha nación nas diversas folgas mineiras dos anos 20 e 30, así como durante a Revolución do 34 e a mesma Guerra Civil. Dela, Asturias vai saír dobremente derrotada: o proletariado, vencido; e a burguesía, suplantada; non lle merecía a suficiente confianza ao réxime franquista fronte a unha clase obreira sometida, pero cun discurso vigoroso. Por suposto, tratarase de novo dunha dereita allea aos costumes do país. Unha vez rematado o franquismo houbo que retomar o asturianismo político.
Non chegará a ter representación parlamentaria ata que Xuan Xosé Sánchez Vicente (PAS) acadara representación na Xunta Xeneral del Principau (ano 1991 ata 1999), e tamén coa xa mencionada creación da URAS (deputados no 1999 ata o 2003)
Hai tradición histórica, por modesta que sexa, da que tirar para emprender un novo proxecto de corte asturianista e reenganchar cun sentimento ben establecido na comunidade veciña. Queda por ver que o consiga e que esa aposta cristalice nun proxecto asturianista (ben sexa polo éxito maior ou menor que poida acadar, ben pola orientación que lle dean ao mesmo independentemente do éxito que acade). Polo que se refire ás posibilidades do mesmo todo indica que o mapa político asturiano non vai ser o mesmo a partir do 22 de maio.
Farruco GRAÑA
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continúa con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
Finalizado o encontro, de carácter privado, o Cónsul asinou no Libro de Ouro da Deputación e a Presidenta fíxolle entrega dun agasallo institucional. Trala xuntanza Carmela López manifestou a súa satisfacción porque “traballamos para avanzar en novas vías de colaboración, e en posibles proxectos que serven para reforzar a relación entre a Deputación e o veciño país de Portugal”.
