O Concello de Cervo pon en marcha un servizo de recollida gratuíta de residuos eléctricos e contaminantes

O Concello pon en marcha un novo servizo de recollida gratuíta de residuos eléctricos e contaminantes

-As persoas usuarias terán que depositar os aparellos na nave de obras municipal situada no polígono de Cuíña durante o seu horario de apertura

Cervo, 19 de xullo de 2012-A delegación de Medio Ambiente do Concello de Cervo anunciou hoxe a posta en marcha dun novo servizo gratuíto de recollida daqueles residuos que non se poden depositar nos colectores de lixo tradicionais, é dicir, que pola súa natureza conteñan elementos contaminantes ou con necesidades específicas de tratamento.

As persoas que queiran desfacerse dalgún aparello con esas características deberán achegar os residuos ata a nave de obras municipal, situada no polígono de Cuíña, os luns, martes, xoves e venres entre as 9:00 e as 13:00 horas e os mércores de 16:00 a 20:00 horas. Será imprescindible que os usuarios deste servizo respecten ese horario e depositen os obxectos no interior da nave para evitar a acumulación de residuos contaminantes na rúa. Os aparellos serán almacenados nesas dependencias e posteriormente serán retirados por xestores autorizados que se encargarán do seu tratamento.

Entre o tipo de residuos que se poderán desbotar atópanse grandes e pequenos electrodomésticos, equipos de informática e telecomunicación, aparellos eléctricos ou electrónicos, xoguetes e equipos deportivos ou de tempo libre, instrumentos de vixilancia e control, lámpadas fluorescentes, de baixo consumo, luminarias compactas con lámpadas fluorescentes ou de baixo consumo e luminarias sen lámpadas.

Coa activación deste novo servizo para a veciñanza, o Concello “da un paso más en la mejora de la recogida y gestión de los residuos, poniendo a disposición de la ciudadanía un punto concreto para el depósito de aparatos que por sus características necesitan un tratamiento específico” explica a edil de Medio Ambiente, Begoña Alonso. A concelleira agarda que “esta iniciativa tenga una buena acogida por parte de los cervenses”, con la que “pretendemos facilitar la tarea de deshacerse de un electrodoméstico u otros aparatos que no se pueden depositar en los contenedores situados en las calles, y al mismo tiempo fomentar la colaboración ciudadana en el cuidado del medio ambiente, evitando la creación de vertederos incontrolados” remata Alonso.