O CLUB FLUVIAL DE LUGO, GAÑADOR DA II COPA DEPUTACIÓN DE PIRAGÜISMO
O vicepresidente da Deputación explicou que “a colaboración dos clubs de piragüismo das localidades nas que se disputan as regatas é indispensábel á hora de celebrar esta competición, ao mesmo tempo que contribúen á revitalización deste deporte na provincia”
Esta última proba da competición provincial disputouse hoxe en Foz, e nela participaron 162 padexeiros, en categorías dende a benxamín ata a veterana
Foz, 9 de setembro de 2012. O Club Fluvial de Lugo foi o gañador da II Copa Deputación de Piragüismo, así como da sexta e última regata, disputada hoxe en Foz, na que participaron 162 palistas, quedando segundo o Club Kayak de Foz, e terceiro o Club Piragüismo Viveiro. O vicepresidente da Deputación de Lugo e responsábel das áreas de Benestar Social e Deporte, o nacionalista Antonio Veiga, foi o encargado de entregar os premios e clausurar esta competición.
Neste sentido, Antonio Veiga felicitou a todos padexeiros que participaron nestas seis regatas e amosou o seu agradecemento “a cada un dos clubs que apoiaron e colaboraron no desenvolvemento desta segunda edición da Copa Deputación de Piragüismo, pois un dos principais obxectivos que nos marcamos desde a área de Deporte da Deputación é a revitalización dun deporte histórico na provincia, como é o piragüismo, para o que é imprescindible a colaboración dos clubs, auténticos motores do deporte”.
O Vicepresidente da Deputación de Lugo fixo fincapé no feito de que “se mantivo a cantidade económica destinada á organización respecto á primeira edición, grazas ao incremento do número de fichas federativas, co que cada vez máis xente practica piragüismo en Lugo, polo que estamos vendo o noso obxectivo cumprido”.
Dende abril ata o mes presente disputáronse as 6 regatas puntuables que conforman esta competición provincial, cada unha delas organizada en colaboración con cada club participante no seu lugar de orixe; esta última co apoio do Club Kaiak de Foz.
As diferentes regatas desta competición provincial, deron cabida a todas as categorías de idade, desde benxamín ata veteranos na modalidade de Kaiak, e desde infantil ata veterano, en canoa.
VICEPRESIDENTE DA DEPUTACIÓN DE LUGO ENTREGOU OS PREMIOS DA REGATA DO CAMPIONATO GALEGO DE VELA DA CLASE OPTIMIST
Antonio Veiga explicou que “encontros deportivos como o que hoxe nos ocupa demostran o firme compromiso que a área de Deporte da Deputación ten adquirido cos deportes náuticos”
Arredor de 100 embarcacións de vela se deron cabida esta fin de semana na Ría de Foz
Foz, 9 de setembro de 2012. O vicepresidente da Deputación de Lugo e responsábel das áreas de Benestar Social e Deporte, o nacionalista Antonio Veiga, foi o encargado de entregar os premios do “Trofeo Virxe do Carme”, a regata do Campionato Galego de Vela da Clase Optimist, organizada polo Club Náutico de Foz e a Federación Galega de Vela, en colaboración coa Vicepresidencia da institución provincial.
Desta proba que está dirixida a rapaces e rapazas de entre 10 e 15 anos de idade, procedentes das catro provincias galegas, e na que participaron arredor de 100 embarcacións, saíron os 10 mellores nenos e nenas que comporán o equipo galego de Optimist para as competicións que se celebren fóra de Galiza.
Durante a súa intervención, Antonio Veiga explicou que “competicións deportivas como a que hoxe nos ocupa, demostran o compromiso que a área de Deporte da Deputación de Lugo ten adquirido cos deportes náuticos. Grazas á Vicepresidencia do ente provincial, a vela e o piragüismo foron protagonistas esta fin de semana na Mariña, concretamente aquí en Foz, algo moi positivo tanto para o deporte como para a actividade económica da comarca”.
Os servizos sanitarios trasladaron ao hospital a tres persoas implicadas nunha colisión frontal en Castro de Rei. Unha delas tivo que ser excarcerada polos Bombeiros de Vilalba. Contra as 11:15 horas, un particular informou ao 112 Galicia dun choque entre dous vehículos no quilómetro 71 da N-640, á altura da parroquia de Viladonga. Desde o punto, os alertadores sinalaron que unha persoa permanecía atrapada. Desde o Centro Integrado de Atención ás Emerxencias activouse un operativo no que participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada. Os bombeiros liberaron á persoa, que foi trasladada xunto con outros dous feridos ao hospital en ambulancia.
A viaxe, enmarcada no proxecto «Relevo Xeracional: O Futuro do Mar» e organizada en colaboración co GALP Itsas Garapen Elkartea, permitiu achegarse a iniciativas como Kofradia Basque Seafood, a Escola de Pesca de Ondarroa, AZTI, Albaola ou o Itsas Museo de Donosti, así como a proxectos vinculados directamente á actividade pesqueira e á divulgación, incluíndo o uso de realidade virtual. O intercambio con Euskadi permitiu coñecer modelos que combinan formación, investigación, transmisión do coñecemento e modernización do sector, contribuíndo a identificar novas vías para facilitar a incorporación da mocidade á actividade pesqueira e garantir a continuidade das comunidades costeiras galegas.
A artista, referente da música popular galega, conectou cun público diverso que gozou dunha sesión vermú marcada por máis de trinta anos de traxectoria. O concerto serviu tamén como despedida e recoñecemento a Valentín González e Viviana Pérez, que deixan a organización da comisión de festas tras dúas décadas. O deputado de Mocidade, Daniel García, destacou a importancia da implicación veciñal para manter vivas as celebracións que fortalecen a identidade comunitaria e reafirmou o apoio da Deputación ás redes asociativas e á programación cultural en galego. A actuación forma parte da iniciativa provincial para achegar música tradicional e en galego a todos os públicos.
Cómpre sinalar que este produto conta cun distintivo de calidade diferenciada, a Indicación Xeográfica Protexida Faba de Lourenzá, un dos 36 selos recoñecidos en Galicia que amparan a súa excelencia. Neste sentido, a Xunta vén de lanzar a nova marca Aquí Sabemos, coa que se busca reforzar o coñecemento e a identificación por parte dos consumidores dos produtos alimentarios galegos protexidos por figuras de calidade diferenciada.
Co sol ocultándose e a lúa asomando entre as torres de Donlebún, o músico e divulgador reivindicou o poder evocador e transformador do bravú fronte á morriña paralizante. Na sala de lectura da biblioteca, Souto explicou a evolución do rock bravú no imaxinario galego, evocando as músicas populares que acompañaron durante décadas os remolques dos pascualiños e os labores comunitarios, e lembrando a vitalidade de grupos como Skornabois, Diplomáticos de Monte Alto, Xenreira, Zënzar, Pinto de Herbón ou os Rastreiros. A boa lembranza da súa anterior visita levou ao artista a pechar a velada interpretando o “Himno de Ribadeo”, composto por Arturo Mogo, nun final cheo de afecto pola vila e pola súa identidade cultural.
O evento ofrecerá mel, produtos de tempada, artesanía, gastronomía e outras propostas locais. O Concello do Valadouro mantén aberto o prazo de inscrición para persoas e empresas expositoras, que poden presentar a súa solicitude na sede electrónica ou nas oficinas do Centro Socio-cultural, Xuvenil e da Terceira Idade “Manuel Lourenzo” ata o martes 6 de outubro, ou ata completar os postos dispoñibles.
Neste espazo radiofónico Félix Jorquera falou coa alcaldesa de Lourenzá, Rocío López; co concelleiro de Cultura, Manuel Arango; con José Cuadrado, presidente da Indicación Xeográfica Protexida Faba de Lourenzá e pregoeiro desta edición da festa; co chef Pedro Barreira; e con Antonio Irimia, presidente do club VespaFaba & Clásicos, de Lourenzá. Por diante queda toda unha fin de semana chea de actividades arredor da faba de Lourenzá. Os organizadores animan a acudir a esta cita.
