O BNG afirma que co PP aumentou o paro un 40% en Foz e que se fixo unha pasarela innecesaria

O BNG DE FOZ AFIRMA QUE CO PP AUMENTOU UN 40 % O PARO NO CONCELLO DE FOZ

“Moitas pequenas e medianas empresas tiveron que pechar mentres a banca recibe milleiros de millóns de euros públicos sen devolución” afirma Basanta

Foz a 18 de outubro de 2012.- O BNG de Foz quer denunciar publicamente que co goberno do PP na Xunta o número de desempregados e desempregadas no Concello de Foz aumentou preto dun 40%. Segundo os datos do Instituto Galego de Estatística o número de parados e paradas en marzo do ano 2009, antes de entrar Feijoo na Xunta, era de 519 e tres anos e medio despois, en outubro de 2012, é de 709 persoas. É dicir, case 200 parados máis que representan unha suba dun 36,6 %. Nos sectores que máis medrou o paro foron a construción e o sector servizos, principalmente a hostalería.

No conxunto na Mariña, o Concello de Foz está case un punto por riba da media pois o paro aumentou nestes anos sobre un 35,88 %, pasando de 3.534 desempregados e desempregadas no ano 2009 a 4.804 no terceiro trimestre deste ano.

Co PP gobernando, destrución de empresas e máis paro

Esta é a tónica xeral na nosa comunidade nos anos do goberno de Feijoo. Temos que ter en conta que despois de tres anos e medio, Galiza é a comunidade do Estado na que máis subiu o paro. Pasou de 162.700 persoas en 2009, cando asumiu o goberno da Xunta, a máis de 275.000 persoas en paro na actualidade, colocando a Galiza á cabeza do Estado na destrución de emprego. O número de traballadores afectados por ERES disparouse neste ano 2012 nun 43% (16.428 persoas afectadas). Na comarca da Mariña, dende xuño de 2009 o paro rexistrado incrementouse o 52% mentres nese mesmo tempo medraba un 38% no conxunto de Galiza e un 32% no Estado.

Ao mesmo tempo, entre 2008 e 2010 Galiza perdeu 4.500 empresas, na súa gran maioría pemes, segundo os datos do Instituto Nacional de Estatística. Neste 2012 na Galiza disolvéronse preto de 1.500 empresas.

Co BNG, máis emprego público e axudas ás pemes

Para parar esta sangría de destrución de emprego, o BNG xa puxo enriba da mesa en moitas ocasións medidas para freala. Entre outras a creación de emprego público a través da construción dun centro de día e dunha residencia que dera traballo alomenos a 100 familias. Ao mesmo tempo dar crédito ás pequenas e medianas empresas para que poidan continuar a súa actividade neste momento que o necesitan e poñer eses créditos á súa disposición obrigando aos bancos a dalos e a través dunha banca pública galega e do Instituto Galego de Crédito.

O BNG DE FOZ CRITICA AO PP POR GASTAR 50.000 EUROS NUNHA PASARELA PORTUARIA INNECESARIA

“Son moitos cartos nunha pasarela cando Foz ten moitas déficits sociais e servizos públicos mal atendidos” afirma Basanta

Foz a 17 de outubro de 2012.- O BNG manifesta a súa contrariedade por aparecer, en plena campaña electoral, unha obra na zona do porto que consiste ao parecer nunha pasarela flotante. O custe da obra, suponse que financiada por Portos de Galicia, aproxímase aos 50.000 euros.

En primeiro lugar, a intencionalidade da obra deixa moitas dúbidas tanto polo momento de comezalas como pola falta de transparencia das mesmas. Desde o BNG queremos manifestar o noso rexeitamento á oportunidade electoralista da obra, en plena campaña electoral e sen previa información do proxecto aos grupos da corporación municipal. “Estamos fartos destas prácticas por parte do PP durante a campaña, dado que xa en varias ocasións foi reprendido por saltarse a lei electoral. Este é outro exemplo máis do uso partidario dos organismos públicos. Coa chegada do ministro de industria asfaltáronse varios tramos da estrada N-642 ao seu paso polo concello; agora, Portos fai o paripé co inicio dunhas obras no porto”, declara Basanta, o portavoz municipal do BNG.

Por outro lado, desde o BNG vemos un despropósito que se gasten case 50.000 euros (como aparecía nun taboleiro instalado diante do peche metálico das obras) nunha pasarela flotante que non parece unha urxencia nestes momentos. Como alternativa o BNG propón que se usen eses cartos en servizos sociais municipais como pode ser contratar persoal para axuda no fogar, para ampliar a escola infantil ou para abrir a biblioteca polas tardes, entre outras moitas cousas.

Se por ser obras do ente Portos de Galicia non se considera oportuno dedicar estes cartos a outra cousa que non sexa competencia deste organismos tamén damos alternativas a esta obra desde o sentido común. Se o motivo parece ser que é ampliar a beirarrúa, o BNG propón que saquen en primeiro lugar os bancos de pedra e as papeleiras que están estorbando enriba dela. Desa maneira gañárase un espazo importante e serán máis cómodas e seguras. E os cartos que van a gastar na pasarela poderían usarse en facer máis pantaláns, poñer a funcionar as cámaras de vixilancia ou dragar a entrada do porto dunha vez por todas porque é unha vergoña a situación de calado da entrada do porto.