O PP pregunta ao Goberno do estado se cumprirá a moción do Senado que obriga a acometer a rehabilitación integral do mosteiro de San Salvador de Lourenzá

Os senadores populares apelan ao artigo 178.2 do Regulamento do Senado que establece que o Goberno debe informar sobre o cumprimento dado ás mocións aprobadas dentro dos seis meses seguintes

Lourenzá, 8 de xullo de 2025. Os senadores do PP lucense – José Manuel Barreiro, José Manuel Balseiro e Juan Serrano- esixen ao Goberno de Sánchez explicacións sobre as xestións realizadas para dar cumprimento ao aprobado na Comisión de Cultura o 24 de febreiro: o Senado instaba ao Goberno a liderar e financiar, con cargo a fondos estatais, a obra de rehabilitación integral do Mosteiro de San Salvador de Vilanova de Lourenzá.

O acordo recollía tamén que o Goberno de España elaboraría e executaría un proxecto de intervención, só ou en concorrencia con outras administracións, co fin de preservar, protexer e poñer en valor esta xoia patrimonial, arquitectónica e relixiosa declarada Conxunto Histórico-Artístico.

Os populares formulan esta pregunta atendendo ao artigo 178.2 do Regulamento do Senado, que establece que dentro dos seis meses seguintes, o Goberno ou o órgano correspondente deberá informar sobre o cumprimento dado ás mocións aprobadas pola Cámara.

O senador mariñán, José Manuel Balseiro, explica que, en resposta oficial ás preguntas dos populares, “o Goberno confirmaba en novembro do 2024 que non tiña previsión de facelo a pesar de que existen múltiples axudas para a conservación do patrimonio arquitectónico”. Polo tanto, agarda que “o Goberno de Sánchez rectifique e cumpra o acordo do Senado”.

Os populares agardan, polo tanto, que “o Goberno explique que pasos se deron para liderar a rehabilitación deste monumento declarado Ben de Interese Cultural (BIC)” e que “non sume outro incumprimento máis” en relación ao mosteiro.

Primeiro, prometeron unha obra de rehabilitación que superaría os 2M€ con cargo ao Plan Nacional para o turismo Xacobeo 21/22 “que nunca chegou a executarse”.

E, máis recentemente, solicitaron 3M€ dun proxecto de case 4,3M€ con cargo ao programa do 2% Cultural estatal. Pero “a finais de decembro saíu a resolución, case ás agachadas, en Nadal para que non se entere ninguén, e a solicitude do mosteiro de Lourenzá foi outra vez rexeitada. E non é porque se trate dun ben da Igrexa” porque “entre os máis de 30 beneficiarios destas axudas hai outros inmobles similares”.

Administracións como a Xunta souberon ver o seu valor e promoveron obras de restauración e conservación, pero “é preciso unha actuación máis ambiciosa que tería perfecto encaixe entre as financiadas con cargo a fondos estatais”, segundo consideran os populares.