Orgullo galego
Épica vitoria do Burela Pescados Rubén que defendeu con intelixencia e orgullo a súa escasa renda (1-2), nuns minutos finais que disputou en inferioridade numérica, tras a expulsión de Lucía Nespereira, e co Universidade de Alacante con xogo de cinco.
Non mereceu sufrir tanto o equipo dirixido por Javier Pardeiro que logra tres valiosos puntos nunha cancha complicada e mantén o pulso polo liderado da Primeira División. Tras oito xornadas, un empate e sete vitorias consecutivas iluminan o ronsel laranxa.
O encontro respondeu ás expectativas e ambos equipos presentaron as súas credenciais desde o asubío inicial. O conxunto alacantino saltou á pista con ambición, presionando en zona alta a un Burela que liquidaba con calidade e bo xogo a proposta local. O control do xogo foise tornando de cor visitante, branco nesta ocasión, aínda que o gol se resistía a pesar das ocasións xeradas. Ata que no ecuador desta primeira singradura, a capitá do barco burelense, Dolo, pescou un rexeite tras disparo de Dany para marcar o rumbo da vitoria.
Co 0-1 acentuouse o dominio mariñán pero a falta de puntería impediu unha maior renda. Ao fío do descanso, Maite impartiu maior xustiza culminando unha xogada de preciosa factura. Taconazo de Dany a Peque que envía o coiro ao segundo pau onde aparece Maite para bater a meta local. Co 0-2 no marcador chegouse ao tempo de tregua.
No segundo envite, a navegación resultou máis turbulenta. Ao minuto de xogo, Txitxo logrou reducir a vantaxe (1-2), nunha acción afortunada, invitando á emoción ao partido. O empuxe local aumentaba e a frescura burelense acusaba a intensidade do duelo.
Nesta fase de maior equilibrio, as mariñás desaproveitaron unha superioridade numérica, tras a expulsión de Ángela no minuto 26. As pulsaciones aumentaban co paso dos minutos e co porto da vitoria no horizonte chegou a expulsión de Lucía Nespereira, minuto 37. Coas forzas baixo mínimos, superioridade numérica alacantina durante dous minutos e a aposta local de cinco no último, emerxeu o orgullo e a intelixencia táctica do Burela Pescados Rubén para conquistar un novo porto e regresar a casa cun botín de tres puntos.
Ficha técnica
Universidad de Alicante: Sonia, Andrea, Sareta, María, Sofía Vieira –cinco inicial- Mónica, Pau, Txtixo, Ángela e Noelia.
Burela Pescados Rubén: Jozi, Dolo, Lucía Nespereira, Peque, Dany –cinco inicia- Lidia Mesías e Maite.
Goles: 0-1, min.11, Dolo; 0-2, min.19, Maite; 1-2, min.21, Txitxo.
Árbitros: Fortes Pardo e Martínez Flores. Colexio murciano. Amosaron cartón amarelo a Sareta, min.12, e Ángela, min. 10 y 26, no Alacante. Do Burela amonestaron a Jozi, min. 24, e Lucía Nespereira, min. 5 y 37.
Baixo o título “A guerra en Oriente Medio. Do xenocidio en Palestina á agresión a Irán”, o analista internacional Duarte Correa ofrecerá unha intervención centrada na evolución do conflito, o impacto humanitario e as implicacións xeopolíticas da escalada bélica na rexión.
A proba, organizada polo CP Altrúan, reunirá 137palistas dos seis clubs lucenses de augas tranquilas que participan na competición: o propio Altruán, o CD San Ciprián, o Club Kayak Foz, o CP Viveiro Urban Hotel, o Cidade de Lugo e o Club Fluvial de Lugo. O deputado de Mocidade Daniel García achegouse esta tarde a Ribadeo para presentar a proba, que comezará ás 15.30 coa saída dos prebenxamíns e benxamíns. A continuación e de forma escalonada, desenvolveranse as probas das categorías infantil, alevín e cadete e xuvenil.
A partir das 19:45 horas abrirán a xornada o Cuarteto Illa Pancha e Tradigalu, mentres que desde as 20:00 horas se poderán degustar hamburguesas á parrilla, bocadillos de panceta e chourizos asados. Xa pola noite, ás 21:30, tomarán o relevo Mi Rollo es el Rock, antes da tradicional fogueira de San Xoán, prevista para as 00:00 horas. A celebración, organizada por A Rebolaxe coa colaboración do Concello de Cervo e a Deputación de Lugo, inclúe tamén o sorteo dunha paleta de cocho e contará con aparcamento habilitado no Estanco da Praia do Torno.
A Garda Civil de Burela tomou declaración este 10 de xuño a unha representante do departamento en liña de Porcelana de Sargadelos, que denunciou unha estafa na que se emprega a imaxe da empresa para enganar clientes. Segundo explicou, desde finais de abril están a aparecer páxinas web falsas con descontos do 80% e perfís fraudulentos en redes sociais como Instagram, TikTok e Facebook, a través dos que varios usuarios xa foron estafados. A compañía presentou denuncias contra distintos dominios e contas, das que só unha continúa activa, e achegou tamén os rexistros da marca e as comunicacións realizadas ante Meta. A denuncia foi formalizada no cuartel da Garda Civil de Burela, onde quedou incorporada ás dilixencias abertas polo corpo.
O deputado galego Francisco Millán Mon explicoulles o día a día da súa actividade nesta cámara e a importancia da Unión Europea para Galicia e viceversa. Desde a dirección do centro agradecen “a súa exposición e o trato dispensado ao alumnado e profesorado desprazado a Bruxelas”. Neste 2026 cúmprense 40 anos da adhesión de España á Comunidade Económica Europea, así se denominaba naquel momento. O IES de Ribadeo é Escola Mentora do Programa Escolas Embaixadoras do Parlamento Europeo.
Foi unha xornada máxica na que a música e a convivencia se deron a man nunha contorna única. Os instrumentos de corda encheron de melodías os xardíns do centro, creando unha atmosfera especial que emocionou ao público asistente e puxo en valor o talento e a ilusión da mocidade. A alcaldesa de Cervo, Dolores García Caramés, non quixo perderse esta cita tan especial e desfrutou da tarde xunto ás persoas usuarias, e o persoal do centro. Durante o encontro, agradeceu o convite e felicitou á organización por promover actividades que fomentan a cultura, a inclusión e os espazos de encontro entre a veciñanza.
A mostra, aberta na sala de exposicións do Auditorio Municipal de luns a venres entre as 18:00 e as 22:00 horas, reúne preto de 30 obras de artistas emerxentes e consolidados, ofrecendo diversas miradas sobre a paisaxe, a identidade, a memoria e a realidade contemporánea. A alcaldesa, Marta Rouco, destacou o valor de que Vilalba forme parte desta programación compartida e o impacto positivo que supón para a actividade cultural local.
