O BNG de Lourenzá lamenta a posición do goberno local entre a compañia eléctrica e os usuarios da liña

O BNG DE LOURENZÁ LAMENTA A POSICIÓN DO GOBERNO LOCAL ENTRE A COMPAÑIA ELÉCTRICA E OS USUARIOS DA LIÑA

Lourenzá, 8 de novembro de 2012. Dende o BNG de Lourenzá lamentan unha vez máis a actitude do goberno municipal do PP e a súa premura á hora de rexeitar calquera tipo de responsabilidade, ainda que isto sexa consecuente coa política Feijoo.

O BNG laurentino rexeita as acusacións do goberno municipal, pois é o membrete e o selo do Concello o que aparece no bando público emitido pola administración local anunciando os cortes no suministro eléctrico así como as zonas e as horas que se verán afectadas. Os nacionalistas laurentinos fan fincapé no feito de que o goberno local considere, segundo se desprende das súas declaracións, a existencia de cidadáns de primeira ou segunda categoría dentro das fronteiras do Concello. Neste senso o BNG censura as verbas do concelleiro de Comercio, Antonio Reigosa, que se xustifica pouco menos que calificando de menos graves os cortes que se podan producir nunha parroquia que no casco urbán, ainda que en ámbolos casos como todos sabemos paguen o mesmo pola enerxía eléctrica. Dende o BNG queren deixar claro que as declaracións deixadas polo señor Antonio Reigosa son pobres e cortas de miras dado que tamén existen negocios fora do centro, e nesta liña pregúntanse como pode afectar un corte de 7 horas no suministro eléctrico por exemplo a unha explotación gandeira que actualmente está a vendelo leite por debaixo do seu custe de produción. O que para os nacionalistas está claro é que ao negocio do señor Reigosa situado no casco urbán non lle afecta o corte, segundo as súas explicacións, agora só nos falta saber que pasaría se non fose así.

No BNG de Lourenzá queren recordar ao goberno municipal que o feito de suplir a enerxía da rede, por exemplo con xeradores xa se está a facer en moitos Concellos cando se producen tarefas de mantemento ou modificación da rede, e unha vez máis lamentan o posicionamento do goberno laurentino ao que só se lle pedía respaldar aos veciños e os seus dereitos como consumidores.

Creen firmemente no BNG de Lourenzá que si as administración local canalizara e secundara as reclamacións, estas terían moito máis peso fronte á compañía, e recordan a dificultade que os usuarios se encontran sempre á hora de facer reclamacións ás empresas deste sector para que bonifiquen as perdas de servizo ou as facturacións incorrectas, pois cobran o que queren cando queren, sentando a base incorrecta de que para o usuario todo son obrigas sen ningún dereito.