Alfonso Fuente amósase satisfeito polas sete bandeiras azuis que conseguiron as praias de Barreiros

Barreiros, 23 de maio de 2013. As praias de Arealonga, A Pasada, Lóngara, Acantilado-Remior, Altar, San Bartolo e Fontela-Valea conseguiron as bandeiras azuis 2013 que concede Adeac. O alcalde, Alfonso Fuente, amósase moi satisfeito.

O rexedor sinalou que “no nome de todo o pobo de Barreiros novamente teño que felicitar a toda a xente que traballa no día a día, aos empregados municipais que colaboraron na limpeza así como a todos socorristas, porque de novo revalidamos esas sete bandeiras azuis. Se ben é certo que tíñamos solicitado oito manter as sete para nós é un feito importante”.

Fuente Parga considera que “se fixo un esforzo grande, porque hai que pensar que se fixo un axuste tamén moi grande e iso podía redundar nunha perda de distintivos importante. É certo que a praia de Coto este ano non revalida ese galardón de bandeira azul, pero tamén hai que dicir que ese areal está en excelentes condicións. É máis, é unha praia na que non desemboca ningún regato nin nada co cal a calidade da auga é perfecta, coma sempre, e non hai ningún problema”.

O alcalde de Barreiros lembrou que “como xa dixen nun pleno nós non vamos facer un gran vehículo se non somos capaces de pagarlle o seguro. Nós vamos chegar ata onde poidamos e creo que a confirmación de que mantemos 7 bandeiras azuis é un feito moi importante, tendo en conta os axustes que houbo que facer. Polo tanto quero agradecer a toda a xente que traballa vinculada ás praias porque creo que se fixo un traballo moi importante”.