Hai que reaccionar

Carlos do Cristo.- Que bonita quedou a estrada que vai dende O Castelo a Viveiro, preciosa!, recén parchada, “pintadita” de novo… do trinque vamos!! Pero que descaro!! Hai uns días saía o Señor Conselleiro dicindo na prensa que non había data para comezar de novo os traballos da tan ansiada vía de alta capacidade, pero iso si, para botar un pouco de asfalto e unha pouca pintura… para iso non hai problema. FARANGULLAS É O QUE NOS DAN!!

Aínda me lembro cando uns días antes das eleccións chegaron uns camións Ó Cruceiro para mover pedras dun lado para outro, e dalí a uns días, pasadas as eleccións, marcharon, e non pasou nada; míntennos á cara e non pasa nada. Igual que cando no mes de xuño o noso alcalde dixo que non había motivo para sospeitar que ían quitar un médico de Xove, e no mes de agosto desaparece ese médico. De novo míntennos á cara e de novo segue sen pasar nada!. Hai que ter descaro para mintir de tal xeito e nin sequera poñerse rubo!.

Hai que reaccionar, protestar e se fai falla patalexar, que esta xente está ahí a velas vir, metendo capotazos, agardando “que pase o temporal”, nada máis que defendendo o deles e o do Partido Popular, e nunca me cansarei de repetir que un político bo é o que defende o seu pobo e os intereses de todos, non as siglas ás que pertence, sexa o PP coma neste caso, ou sexa outro calquera.

Carlos do Cristo.