Os socialistas de Xove lamentan que o Partido Popular rexeitase a moción debatida no Pleno celebrado onte, e na que se instaba á Xunta de Galicia a aumentar o investimento destinado a financiar o servizo de Axuda no Fogar neste Concello. O voceiro Alberto Santos, acusa ó Alcalde e ós seus compañeiros de Partido de “boicotear claramente” este servizo tan demandado no municipio e tan necesario para os veciños. Deste xeito, considera “inadmisible a actitude do PP, pois en vez de priorizar o benestar dos cidadáns só lle preocupa non molestar ós seus compañeiros da Xunta de Galicia. Non vai ser que Feijóo se enfade…”, engadiu.
Neste senso, Santos lembrou que a administración autonómica está a xerar un bloqueo preocupante destas prestacións non só en Xove e na provincia, senón tamén en toda a comunidade, provocando así situacións dramáticas tanto social como economicamente nas familias destinatarias das axudas e nos profesionais especializados na atención sociosanitaria.
O Partido Popular está a manter “unha liña errática”
Segundo o socialista, o Goberno galego está a manter “unha liña errática”, que se traduce nun baleiro de xestión e nunha situación de desgoberno en materia de servizos sociais. Deste xeito, criticou que aprobase o pasado ano unha norma de rango regulamentario –o Decreto 99/2012 de 16 de marzo- no que se pretendía alterar o réxime competencial que establecen o Estatuto de Autonomía de Galicia e a lexislación de Servizos Sociais, coas conseguintes consecuencias orzamentarias para o resto das Administracións Públicas implicadas e que, igual que a Deputación de Lugo, xa tiñan o seu Orzamento aprobado e moi avanzado no seu nivel de execución.
Mediante esta tentativa, a Xunta, subliñou, unicamente pretendía deixar de aboar os cartos e trasladar esta competencia ás Deputacións e Concellos, desentendéndose así da xestión dos servizos sociais comunitarios nos municipios de menos de 20.000 habitantes que, no caso da provincia de Lugo, son todos agás o da capital.
En contraposición á xestión levada a cabo pola administración autonómica neste asunto, destacou, a Deputación, sen ter competencias na materia, fixo un esforzo inversor importante ó incrementar en 2013 un 50% a a achega provincial para este Servizo, pasando de 600.000 euros nos últimos dous anos a 1,1 millóns nesta anualidade.
“Feijóo decidiu dun día para outro que non poñía máis cartos para a Axuda no Fogar, que a paguen outros… Pola contra, o organismo provincial, en defensa do interese dos lucenses, subvenciona a Axuda no Fogar, aportando o dobre de investimento. Esta é a diferenza entre uns e outros: mentres os socialistas loitamos por garantir o Estado de Benestar, os gobernos do Partido Popular non só o eliminan senón que, como en Xove, impiden claramente calquera iniciativa que vaia destinada a impulsalo”.
Santos denunciou así que o Decreto aprobado en marzo só inclúe o financiamento dunha unidade de convivencia por cada 550 habitantes. Isto implica que un Concello que non chega ós 5.000 habitantes, como pode ser o de Xove, e no que o programa pode alcanzar os 25 traballadores, a plantilla se vexa reducida practicamente na súa totalidade.
Esta situación, subliñou, tamén se produce nos municipios máis poboados da Mariña. Viveiro, por exemplo, con 16.000 habitantes deixou de percibir máis de 42.000 euros polo servizo de axuda a domicilio de libre concorrencia e máis de 60.000 para persoal doutros programas de atención sociosanitaria; afectando así a máis dunha vintena de postos de traballo.
A reforma local non mellora a xestión deste servizo
O voceiro socialista, subliñou, ademais, que o despropósito e desgoberno actual tanto en Galicia como no Estado, móstrase con “cruel claridade nesta materia”, posto que en datas recentes anunciouse por parte do Goberno de España o Anteproxecto de Lei de racionalización e sostibilidade da administración local, na que se avanza que “a titularidade das competencias que se prevían como propias dos Concellos relativas á prestación dos servizos sociais e de promoción e reinserción social, corresponderá ás Comunidades Autónomas”.
Desta forma, considera que a falta de comunicación e entendemento entre os gobernos galego e español é evidente, pois están a lexislar de forma contraria o mesmo servizo. “O primeiro que teñen que facer é poñerse de acordo. Pero mentres e non… que os Concellos e a Deputación se fagan cargo destas prestacións se queren mantelas. Os do PP están acabando con todo, están desmantelando a Educación, a Sanidade e os servizos públicos”, concluíu.
As estudantes recibiron o galardón “Pizza Chef Emergente”, un recoñecemento que destaca o talento das novas promesas da gastronomía e que supón un importante logro para o centro educativo e para a formación profesional da comarca.
O percorrido comeza nun lugar simbólico: as pontes sobre o río Sor, que unen as provincias da Coruña e Lugo e marcan un dos vértices do territorio lucense. Con esta iniciativa, Guido Guía propón unha travesía pola diversidade paisaxística, histórica e humana da provincia, destacando a riqueza dos seus espazos naturais, monumentos e comunidades.
O delegado subliñou o importante papel que realiza o tecido social para conseguir melloras en beneficio da veciñanza e dinamizar social e culturalmente a localidade. Neste sentido, lembrou que a Xunta impulsa o movemento asociativo a través de apoios para o acondicionamento dos seus locais ou para o desenvolvemento de actividades.
A cita será o luns 19 de outubro, ás 17:30 horas, cun punto de encontro no peirao de San Cibrao. Ademais, os diferentes edificios municipais iluminaranse de cor rosa para sensibilizar á poboación sobre a importancia da detección precoz, fundamental para mellorar o prognóstico e a supervivencia das pacientes que padecen esta enfermidade.
O domingo 20 de decembro a Praza César Chavarría acollerá de 11:00 a 20:00 horas unha nova edición do Mercadiño de Nadal organizado polo Concello de Lourenzá, “unha cita para desfrutar do ambiente destas datas e compartir unha xornada especial na nosa vila”, anuncia a alcaldesa, Rocío López. O prazo de inscrición para instalar cun posto xa está aberto e a participación é totalmente gratuíta. As solicitudes poden facerse ata o 16 de decembro nas oficinas do Concello de Lourenzá ou a través do teléfono 982.121.006.
Durante 45 minutos, tres malabaristas —Pablo Reboleiro, Aitor Garuz e Santiago Montero— mergúllanse nun caos divertido onde ninguén manda e todo flúe entre xogos de poder, equilibrios imposibles e humor. A obra amosa como, no mundo dos malabares, romper os patróns establecidos pode levar a descubrir que a verdadeira maxia está en aprender a xogar xuntos.
No encontro, abordáronse temas como a posibilidade de colaborar na mellora da formación dos traballadores, destacando a importancia que ten ese aspecto neste sector estratéxico para Galicia. Tamén se trocaron puntos de vista relativos ás condicións laborais dos profesionais do mar.
