O BNG de Lourenzá reclama financiamento á Xunta para o servizo de axuda no fogar

Lourenzá, 8 de outubro de 2013. O BNG de Lourenzá rexistrou unha moción na que insta ao pleno da corporación a esixir á Xunta de Galiza a incorporación inmediata dunha partida orzamentaria para o vindeiro ano 2014 para asegurar a prestación do servizo de Axuda no Fogar en tódolos concellos de menos de 20.000 habitantes.

Para o BNG laurentino esta é unha oportunidade única para que o goberno municipal de Lourenzá deixe de comulgar con rodas de muíño co que ordenan dende Santiago e comecen a pensar un pouco máis nos intereses e dereitos dos seus veciños. Os Nacionalistas laurentinos desexan recordar que o mesmo PP de Lourenzá xa presentou unha moción en maio de 2012, reclamando máis financiamento para o SAF á Deputación de Lugo apoiándose no decreto 99/2012 do 16 de marzo de 2012, pero o que o PP local non quixo daquela atender foi que este decreto, claramente no seu artigo nº 31 páxinas 27-28 aclara as competencias das Deputacións provinciais en estes casos, deixando ben claro que o incremento da participación das Deputacións no financiamento dos servizos sociais básicos municipais será acompañado da súa correspondente transferencia de fondos dende a administración autonómica ás Deputacións para tal fin.

Todo isto non fai máis que por de manifesto unha vez máis o nivel moral do PP laurentino que aproveita calquera oportunidade para desacreditar aos demais, con enganos e medias verdades, aínda que o que estea en xogo sexa o benestar dos veciños, sempre coa única finalidade de obter réditos políticos.

Para os nacionalistas laurentinos o citado decreto manifesta claramente que a Xunta de Galiza debe de garantir a prestación deste tipo de servizos aos concellos, cousa que non fixo, reducindo o seu orzamento a nada dende o 2010 ao 2012, feito que tivo un importante impacto en Lourenzá, pasándose de máis de 29.000€ para o financiamento do SAF por parte da Xunta no ano 2010 a menos de 5.000€ no ano 2011 ate os 0€ do ano 2012 ou deste mesmo, o cal entre outras cousas implicou unha suba indiscriminada da taxa de copago.