A Deputación insta á Xunta e ó goberno do Estado a adoptar medidas para garantir o futuro do sector lácteo

LUGO .- O pleno da Deputación aprobou unha proposta do equipo de goberno na que se insta á administración do Estado e da Xunta a que adopten medidas para garantir o futuro do sector lácteo.  O pleno tamén acordou instar á Xunta a que de modo urxente, dea outro paso máis, no desenvolvemento do pacto local, a fin de chegar a acordos cos Concellos nos que haxa GRUMIR.
Nota de Prensa

A Deputación insta á Xunta e ó Goberno Central a adoptar medidas que garantan o futuro do sector lácteo

– A Corporación provincial aprobou a proposta que lle será comunicada ós Presidentes das administracións autonómica e do Estado

– O Pleno tamén acordou que a Xunta dea urxentemente un paso máis no desenvolvemento do pacto local co obxectivo de chegar a acordos cos Concellos nos que haxa GRUMIR

O Pleno da Deputación aprobou este martes a proposta do equipo de goberno na que se insta á administración do Estado e da Xunta a que adopten medidas competentes para garantir o futuro do sector lácteo. Na moción especifícase que as explotacións gandeiras achegan o 62% do valor da produción agraria, e dentro delas, a produción láctea representa un 28%.

A evolución da produción láctea en Galicia foi medrando nos últimos anos, de tal xeito que o leite das explotacións galegas en 2008 supuxo o 38% das entregas á industria do Estado, fronte ó 35% que se produciron a comezos de 2006. Pero a liberalización da produción do leite en 2015 sumada ó incremento da cota en todos os Estados produtores da UE, e ó recorte de prezos percibidos polos gandeiros, poñen en entredito a supervivencia de moitas explotacións leiteiras galegas.

Deste xeito, tal e como explicou o Deputado de Gandeiría, José María Arias, a Deputación solicita á Xunta poñer ó servizo das explotacións o Banco de Terras, para que estas dispoñan de máis superficie con posibilidades de aproveitamento; adoptar medidas de apoio ás cooperativas de leite creando un tecido industrial en base ás mesmas; e a posta en marcha dun grupo lácteo galego co fin de poñer en valor o leite producido no país.

Ademais, insta ó Goberno do Estado e á administración autonómica a coordinar actuacións destinadas a garantir a recollida do leite de Galicia, establecer axudas directas ós produtores para compensar o baixo prezo do leite en orixe en tanto non se recuperen os prezos no mercado, garantir a continuidade da industria transformadora existente en Galicia e, en concreto, na provincia de Lugo.

Asimesmo, solicitarase ó goberno do Estado a propoñer na Unión Europea unha actuación decidida para regular os mercados e garantir prezos ós produtores de leite, e garantir a viabilidade do sector. O acordo comunicaráselle tanto Presidente do Goberno, como o da Xunta de Galicia, e ós grupos parlamentarios do PP, PSOE e BNG no Parlamento Galego e no Congreso dos Deputados.

Moción de apoio ós GRUMIR e parabéns para a Torre de Hércules

O Pleno da Deputación tamén acordou instar á administración autonómica, a que de modo urxente, dea outro paso máis, no desenvolvemento do pacto local, a fin de chegar a acordos cos Concellos nos que haxa GRUMIR. A Corporación deu o visto e prace a esta cuestión plantexada polo equipo de goberno porque entende que un dos piares máis importantes cos que conta a Comunidade Autónoma en materia de protección e seguridade da poboación, especialmente en áreas do rural, son os Grupos Municipais de Intervención Rápida (GRUMIR).

Gato Soengas explicou, ademais, que a celebración das eleccións locais do 1 de marzo e as medidas decretadas polo novo goberno da Xunta de Galicia retrasaron a posta en marcha destes grupos, o que está producindo graves problemas na prestación de servizos á poboación, nalgúns casos, con grave risco para os cidadáns. Neste senso, indicou que os operativos de intervención están sempre alerta, dentro do seu ámbito comarcal, de accidentes de tráfico, de incendios urbanos e forestais, de servizos de asistencia á poboación, traslados e asistencia  a colectivos de minusválidos, cooperación con servizos sociais municipais, etc.

Asimesmo, tamén se aprobou por unanimidade a proposta de Presidencia na que se felicitará ó Concello da Coruña pola declaración da Torre de Hércules como Patrimonio da Humanidade. A Corporación provincial, en solidariedade ós numerosos esforzos realizados polo ente local, trasladará a felicitación ó rexedor municipal.

Exentos do IVE por anuncios no BOP

A Deputación tamén decidiu deixar de cobrar o IVE ós Concellos pola publicación dos anuncios de pago no Boletín Oficial da Provincia. Ata o de agora o organismo provincial cobraba este imposto pola inserción dos anuncios correspondentes á licitación de todo tipo de contratos. Con esta medida preténdese aforrar este custe ós Concellos da provincia. Deste xeito dáse resposta á decisión da Dirección Xeral de Tributos. Este organismo establece que as insercións no BOP non está suxeitas ó citado tributo, xa que non concurren á totalidade dos requisitos recollidos no artigo 5.8 da Lei do IVE.