Investiranse máis de 100.000 euros para mellorar camiños no municipio de Ribadeo nas vindeiras semanas

Ribadeo, 17 de marzo de 2014. Máis de 100.000 euros se investirán na mellora de camiños en Ribadeo ao longo das vindeiras semanas. Será a través de sendos plans entre o Concello, a Deputación de Lugo e a Xunta de Galicia. Anunciábao este luns o alcalde, Fernando Suárez.

O rexedor dixo que “agora, despois de que pasaran todas as treboadas e todas as tormentas deste inverno duro que tivemos, chega o momento de que, co bo tempo, teñamos que empezar a repoñer o estado de moitos dos camiños do concello de Ribadeo. De aí que nestes días esteamos empezando un programa entre a Deputación e o Concello, concretamente do plan de obras e servizos de 2013, onde se van investir cerca de 30.000 euros para actuar en varios camiños de diversos barrios das parroquias de Vilaselán, Piñeira e Vilaframil. Concretamente as obras vanse facer nos barrios de A Granxa, Os Garitos, O Circo, Dompiñor, O Valado e A Madanela”.

Suárez Barcia engadiu que “logo tamén estamos iniciando agora a contratación doutro novo programa, neste caso entre a Xunta e o Concello a través do que se chama Agader, para actuar en parroquias como A Devesa, Arante e incluso no núcleo de Remourelle, que aínda que pertence á parroquia de Arante ten unha singularidade propia. Nestas actuacións investiranse uns 75.000 euros”.

O alcalde ribadense subliñou que “en total máis de 100.000 euros vanse investir en mellorar camiños, sabendo que con isto non resolvemos todo o problema que temos en Ribadeo, como hai nos demais concellos, pero é un loita sistemática, anual, para que o estado do viario público sexa o mellor posible”.