Armada lémbralle ao PSOE que o Concello destina 168.000 euros aos Servizos Sociais de Cervo e a Deputación 4.700

Cervo, 10 de xuño de 2014- A edil de Servizos Sociais, Pilar Armada, respondeu ás críticas do PSOE de Cervo con datos clarificadores. Armada fixo públicas as cifras dos cartos que destina cada administración a financiar servizos sociais. Así, sobre un investimento total de 367.400 euros, o Concello destina o 46% (168.500 euros), a Xunta o 53% (194.200 euros) e a Deputación o 1% (4.700 euros).

Neste sentido, Armada asegura que os socialistas “non son os máis indicados para falar de gasto social”, xa que a achega da Deputación é “de risa”.

Ao mesmo tempo, a edil considera que o PSOE de Cervo “ou non se entera ou non se quere enterar de que os cartos cos que se vai financiar a remodelación do campo de fútbol non se poden destinar a gasto social”. Armada lembra que ese investimento sae do remanente de tesourería que, segundo a lei, só se pode dedicar a obras e actuacións que impliquen un aforro económico para o Concello, como é o caso do campo de fútbol, xa que inclúe medidas para reducir o consumo eléctrico e de auga.

Por iso, Armada pídelles aos socialistas “que digan abertamente que non queren que os nenos e nenas das categorías de base teñan un campo en boas condicións. Pero sexan sinceros cos veciños e deixen claro que están en contra de todo o que beneficie ao municipio, igual que fixeron coa praza dos Campos”. “Sempre se opoñen a todo o que xera actividade e dinamiza o concello”, remata a edil.