O Mercado Pirata volve ás festas do Carme e implica á hostalería que preparará tapas temáticas

Cervo, 15 de xullo de 2014- O Concello de Cervo, a comisión de Festas do Carme e a hostalería de San Cibrao deron este martes a coñecer o cartel e a programación do II Mercado Pirata, que se vai celebrar os días 18, 19 e 20 de xullo dentro dos actos programados polas festas patronais da vila.

Un mercado que terá como punto central a praza dos Campos, onde se colocarán os postos de venda con produtos de todo tipo e ambientado na estética pirata. Pero ademais, o mercado terá un engadido lúdico, xa que ao longo dos tres días haberá animación, espectáculos para todos os públicos e queimada.

Da mesma maneira nesta ocasión, como novidade, vaise implicar á hostalería de San Cibrao xa que os bares e restaurantes prepararán “tapas pirata”, pratos especiais para esta cita e con temática pirata cos que pretenden ofrecer “máis opcións gastronómicas e de lecer aos veciños e visitantes que acudan ao mercado” tal e como explica o presidente da comisión e concelleiro, José Ramón Soto, que estivo na presentación xunto á tesoureira da comisión e edil, Pilar Armada, a secretaria, Dolores García Caramés e representantes dos bares e restaurantes.

Nesta ocasión ademais estanse vendendo camisetas conmemorativas do II Mercado Pirata coas que colaborar coa comisión no financiamento das festas, e que estarán dispoñibles nos diferentes actos, no mercado e nos bares e restaurantes que participan.

Un mercado que se inaugurará o venres 18 ás 20 horas e que permanecerá aberto ata as 23 h. mentres os días 19 e 20 o horario de apertura será de 11 a 14 e de 17 a 23 h.