A ordenanza de protección medioambiental de Ribadeo considera unha infracción grave o abandono de enseres na vía pública

Ribadeo, 30 de outubro de 2014. O Concello insiste en que conta cun servizo de recollida de enseres a domicilio e advirte que deixalos abandonados na vía pública será obxecto de sancións que poden oscilar entre os 90 e os 180 euros, segundo informa a Concellaría de Medio Ambiente.

Desde esta delegación municipal sinalan que “dada a grande cantidade de enseres que son abandonados na vía ou en espazos públicos de Ribadeo estes feitos serán investigados e procederase á súa sanción”. E lembran que “a ordenanza de protección medio ambiental do Concello, no seu artigo 76, considera unha infracción grave abandonar mobles ou enseres na vía ou espazos públicos, fixándose unha sanción entre 90,15 euros e 180,30 euros”.

A Concellaría de Medio Ambiente indican que “o Concello pon a disposición dos seus veciños e veciñas un servizo de recollida de enseres a domicilio. No caso dos enseres metálicos (neveiras, lavadoras, cociñas, somieres…) recóllense os primeiros martes de mes, previa solicitude nas oficinas municipais e o pago dunha taxa de 3,47 euros. E os enseres de madeira (sofás, camas, armarios ou doutros materiais coma colchóns…) recóllense os últimos martes de mes, tamén previa solicitude e o pago dunha taxa de 3,47 euros”. E engaden que “ademais os veciños pola súa conta poden acercar os enseres ao punto limpo. Non teñen que pagar ningunha taxa pola xestión dos mesmos”.