O domingo terá lugar a presentación da Xove Orquestra Municipal de Música de Burela, formada por 38 músicos de idades diversas

Burela, 18 de decembro de 2014.- O vindeiro domingo, 21 de decembro, ás sete da tarde na Casa da Cultura terá lugar a presentación da Xove Orquestra Municipal de Música de Burela. A formación, composta por 38 músicos de idades diversas, está dirixida por Xan Carballal.

Carballal sinalou que “despois dun tempo de traballo imos presentar a Xove Orquestra Municipal de Música de Burela o día 21 deste mes, domingo, ás sete da tarde no auditorio da Casa da Cultura. Esta orquestra xurde da escola de música, na que a filosofía é formar aos rapaces en distintos aspectos da música e tendo en conta que o obxectivo é unha formación o máis tradicional posible axeitándose os canons que nos marca a música culta. Entón cremos importante que unha das cousas que tíñamos que poñer en valor é a formación dunha orquestra para saír dos muros do espazo físico da escola de música e proxectala en primeiro lugar cara ao público de Burela, porque é a quen debemos que exista esta escola e esta orquestra. Entón dende comezos de ano marcámonos a meta de que antes de que rematara o 2014 poder estrear a orquestra. A unha sección de corda, que viña funcionando xa dende hai tempo, engádeselle unha sección de vento da propia escola”.

O director da Xove Orquestra Municipal de Música de Burela cre que o proxecto “é interesante, é unha forma de medir a calidade do ensino musical que se está a ofrecer na escola de música para ter un referente, saber onde estamos e o que nos falta. Comezamos con toda a humildade porque neste mundo da música o primeiro que teñen que ser os rapaces é moi humildes, saber que isto é un comezo e que pouco a pouco vamos ir acadando metas, pero o camiño é longo e haberá momentos mellores e peores”.

Carballal considera que “ter unha orquestra deste tipo creo que co tempo se nós somos capaces de responder pode ser un orgullo para Burela, porque é un aspecto da súa cultura e da súa proxección exterior que vai ter moita importancia, como teñen xa outros proxectos como a Orquestra Clásica de Xove. E máxime contando que nos apadriña o Concello de Xove, a orquestra de Xove e os seus profesores que van formar parte do profesorado que vai axudar a preparar ese concerto, polo que saímos con bastante vantaxe. Quero agradecer o esforzo aos alumnos; aos pais, que eu creo que están tan ilusionados como os propios alumnos; e aos profesores que me están botando unha man día a día, o que é moi importante”.

O director da nova formación que se presenta o vindeiro domingo indicou que “son 38 compoñentes, entre os que hai algún antigo alumno da escola, porque quixen abrir a orquestra non soamente aos alumnos que hai agora senón tamén aos que pasaron, que foron bastantes. A pena é non contar con todos, pero hai algúns que están fóra e que lamentablemente non poden estar estes días; están xa facendo a súa vida profesional, pero nalgunha outra ocasión gustaríame contar con todos, porque todos aportaron o seu grao de area para que isto fora posible”.

Para Xan Carballal “o nacemento dunha orquestra nos debe facer sentir ese orgullo, aínda que non sexamos de Burela. Eu non son de Burela, pero estou moi orgulloso como profesor e como amante da música o estou moito máis. Como experto en música sei que é un labor moi difícil e ás veces ingrata. Son instrumentos moi difíciles de tocar, é moi difícil poder chegar a onde están algúns.

Desde o Concello burelés e desde a dirección desta Xove Orquestra Municipal de Música de Burela animan á xente a acudir ao concerto do domingo: “eu diríalles aos que lles gusta a música que acudan a este concerto, porque é unha cousa fermosa ver nacer unha orquestra e poder dicir algún día: eu estiven alí. Hai rapaces que teñen 9 anos, o que indica que algo está cambiando, algo se está facendo ben e xa non nos quedan tan lonxe eses países que teñen unha pegada de música clásica, con algunhas orquestras que levan xa máis de cen anos. E a nós hai anos parecíanos que sería imposible acadar ese nivel, pero estamos no camiño, sempre con humildade. Invito a todos a que veñan porque é moi importante tamén que os rapaces conten coa calor do público”.

Ao acto de presentación do concerto asistiron os alcaldes de Burela e Xove, José Mª González Barcia e Demetrio Salgueiro, a concelleira de Cultura burelesa, Mónica Pedre, e o director da formación e da Escola de Música de Burela, Xan Carballal.