A Vicepresidencia da Deputación construirá un parque de xogos infantís no colexio do Valadouro

O Valadouro, 17 de xaneiro de 2015. Os nenos e nenas do Valadouro contarán antes de que remate o curso cunha zona de xogos infantís dentro das instalacións do propio colexio. A obra, que é financiada pola área de Benestar Social e Deporte que dirixe o vicepresidente nacionalista da Deputación, Antonio Veiga, conta cun investimento de 9.000 euros e comezará de xeito inmediato para que a instalación estea xa operativa antes de que remate este curso.

Con esta actuación, que parte dunha vella demanda dos pais e nais do Valadouro e que se acometará en colaboración coa AMPA do colexio, dótase ao concello cun novo lugar de lecer e esparcemento para os máis pequenos e para a veciñanza en xeral. As obras consisten na execución dun pavimento anticaídas e a instalación de equipamento lúdico dirixido fundamentalmente a nenos de curta idade, entre 3 e 10 anos.

Esta área de xogos infantís ubicaráse dentro do recinto do propio colexio CEIP Santa María do Valadouro, para facilitar deste xeito o seu uso por parte nos nenos e nenas. Para que fose posible instalar o parque infantil dentro das instalacións do colexio, como pedían os pais e nais, foi necesario tramitar un expedente de desafección das instalacións diante da Consellería de Educación, o que retrasou as obras.

Facer fronte aos recortes da Xunta e fomentar a natalidade
O vicepresidente da Deputación, o nacionalista Antonio Veiga, que visitou esta mañá o recinto onde se ubicará o parque infantil acompañado de membros da AMPA do colexio, defendeu a necesidade de acometer esta obra “que debía ter feito a Consellería de Educación pero que non fai porque esta Xunta do PP de Feijóo está nunha campaña brutal de recortes en servizos básicos como a Educación ou a Sanidade sen importarlle que iso vai en detrimento do benestar dos cidadáns”, denunciou.

Veiga defendeu que “é obriga de todas as Administracións públicas desenvolver accións positivas para fomentar o benestar social, especialmente a prestación de servizos sociais comunitarios básicos e remover os atrancos que impidan ou dificulten a participación na vida social da cidadanía, como fai a área de Benestar Social da Deputación”, algo que contrapuxo aos “recortes sociais” da Xunta.

Ao mesmo tempo, o vicepresidente da Deputación defendeu que “é necesario poñer en marcha actuacións coma esta para darlle cobertura a un servizo de atención á infancia, ofrecendo unha alternativa de xogos de desenvolvemento físico e sensorial, favorecendo a interrelación dos nenos e nenas, promovendo a súa autonomía persoal e a súa integración social, máis aínda nun municipio coma O Valadouro, de 2.100 habitantes e cun saldo vexetativo negativo, cunha poboación en regresión e cunha estrutura por idades moi envellecida, situación agravada nas últimas décadas cunha baixa natalidade, polo que é necesario ofertar servizos que animen a natalidade e intenten promover unha reversión desta tendencia, na liña de favorecer o asentamento e o mantemento de poboación nova no territorio”, argumentou.