Xuventudes Socialistas intensificará a súa actividade con diferentes encontros ao longo da provincia

As Xuventudes Socialistas de Galicia no ámbito provincial de Lugo, establecerán diferentes encontros de traballo, coas XSG e as agrupacións do PSdeG, no ámbito interno, de cara a preparar os comicios municipais do vindeiro mes de maio, así como a nivel externo con colectivos que abarcan diferentes temáticas.

Así, tal e como explica o coordinador –Jesús Vázquez-, a nivel interno desenvolverán diferentes plantexamentos de cara a incorporar nos programas electorais dos diferentes concellos asuntos que lle interesan á mocidade e todo o que a ela afecta, como pode ser o caso do emprego.

Compoñente externo
No que respecta ó compoñente externo, escoitaranse e incorporaranse as diferentes reivindicacións de colectivos con temáticas variadas e que abranguen a amplos sectores da poboación.

Neste senso, Vázquez salienta que “nuns momentos de profunda desafección por parte da sociedade cara a clase política, é cando temos que estar máis preto de toda a mocidade, que vei como pouco a pouco, se lle está privando cada día máis da capacidade de traballar no rural, por mor dos continuos recortes efectuados pola Xunta de Galicia”.

“É o momento de dar un paso adiante por parte dos mozos, pois entendemos que a política é un instrumento para cambiar e mellorar a nosa sociedade, nuns momentos de continuos recortes no noso Estado de Benestar”, conclúe.