Primeira Xornada das Olimpíadas Interparroquiais de Alfoz

Alfoz, 12 de abril de 2015.- O pasado sábado, día 11 de marzo, deron inicio en Alfoz as Segundas Olimpíadas Interparroquiais. Tocaba a Proba Cultural, con preguntas de cultura xeral de varios tipos, englobadas en tres xogos diferentes: o Un dous tres, o Trivial e o Stop. Finalmente, despois dunha competición bastante igualada, o gran gañador da proba foi a parroquia de Bacoi, con 162 puntos, seguida das parroquias de Lagoa (que fora a campioa nesta categoría o ano pasado) e Terras Altas, ambas empatadas a 161 puntos. En cuarto lugar quedou a parroquia de Mor, con 156 puntos, seguida de O Castro, con 150 puntos, Adelán, con 144 puntos, Reirado, con 142 puntos, e Carballido, con 98 puntos.

Debemos destacar que, como é habitual, hubo algunhas preguntas polémicas, como unha na que se preguntaban concellos da Mariña Lucense e unha das respostas de Lagoa foi “Abadín”. O Xurado deliberou e deuna por válida (depende de se se considera a Abadín dende o punto de vista xudicial ou administrativo), pero Lagoa, para evitar polémicas, renunciou ós puntos que lle correspondían por acertar, co cal o gañador foi Bacoi. O Xurado estivo formado por Pilar Díaz e Paz Quiroga, profesoras do Instituto Alfoz-Valadouro, Cruz Otero, Directora do Colexio Número 1 de Foz, e Lupe Flórez, profesora no Cantel de Foz e Concelleira de Cultura de Lourenzá.

O Salón de Actos da Casa da Cultura de Alfoz fíxose pequeno para albergar a toda a xente que acudiu ó acto.
A competición continuará o vindeiro sábado día 18 coa proba de fútbol sala, na que o ano pasado gañara a parroquia de Carballido.