César Álvarez quere que na próxima edición de La Silvallana retomen protagonismo os sectores gandeiro e forestal e tamén o comercio veigueño

Vegadeo, 15 de xuño de 2015.- O alcalde, César Álvarez, clausurou este domingo á noite a 52 Feira de Mostras, que se veu celebrando dende o pasado xoves. O seu obxectivo para a próxima edición é que teñan máis presenza en La Silvallana os sectores gandeiro e forestal.

O rexedor dixo que queremos recuperar o concurso de gando vacún frisón, tamén apoiar á raza asturiana, que nos últimos anos veu reforzando a feira de mostras. Temos moi claro que entre todos, sumando a participación, a colaboración e a iniciativa de todo o mundo, hai que encaixar ese puzle para que se volvan crear esas expectativas no futuro e a xente volva ter a necesidade de vir á feira porque esperta curiosidades”.
César Álvarez sinalou que “na feira de mostras o sector gandeiro da bisbarra, en canto a vaca de leite, non estivo representado. Non houbo unha exposición de cooperativas desta zona, que é de vaca de leite. Igual que o sector forestal”.

O alcalde engadiu que “tamén falamos de recuperar a presenza do comercio de Vegadeo, porque hoxe en día non se ve reflectida na feira de mostras a primeira pedra dende a que se empezou a construír esta feira de mostras: o comercio de Vegadeo foi o que propuxo organizar esa exposición dos seus produtos nun día moi concreto, que era a primeira feira. E queremos recuperar iso e volver coller ese impulso”.

César Álvarez percorreu o recinto feiral, departiu con expositores e veciños, entregou os premios do campionato do mundo de patefa e clausurou a 52 Feira de Mostras de Vegadeo preto das dez da noite deste domingo.
A valoración efectuada polo rexedor é positiva “aínda que logo teremos que analizar a venda de entradas e tamén o volume de vendas”.