Alfonso Villares e Juan Francisco López reuníronse en Burela con 11 colectivos da Mariña e recollerón as súas suxestións para elaborar a ponencia política do PP de Galicia

Burela, 2 de xullo de 2015.- O cervense Alfonso Villares Bermúdez e o trabadense Juan Francisco López Prieto recolleron este xoves pola tarde en Burela propostas e suxestións de once colectivos mariñáns de mulleres, vinculados ao mar e á inmigración para incorporar á ponencia política do Partido Popular de Galicia que se presentará durante este mes de xullo.

Ao rematar a reunión Alfonso Villares explicou que participaron nesta xuntanza “como representantes do grupo encargado polo presidente do Partido Popular de Galicia, Alberto Núñez-Feijoo, de elaborar a ponencia política que vamos presentar durante este mes de xullo, para a que se nos encargou a 10 persoas de todo Galicia reunirnos con todos os sectores da sociedade para facer esa labor necesaria de autocrítica, de plantarnos diante da sociedade, de todas as asociacións de todo tipo e de toda índole, de toda a sociedade civil en xeral, e dicirlle claramente que somos unha formación política cuns principios moi claros, de goberno e que nos queremos parecer o máis posible á sociedade que representamos. Queremos ser, sen dúbida ningunha, ese reflexo do sentir maioritario da xente. Tamén somos unha corrente política centrista que se axeita máis a unha forma de vivir sensata, con sentido común, e tamén unha forza política galeguista, sen dúbida ningunha. Esas son as nosas sinais de identidade, entre outras moitas, pero son as que nos identifican no partido político ao cal pertencemos”.

Villares engadiu que “con estas premisas nos plantamos diante das asociacións e hoxe en concreto estiveron con nós os patróns maiores das confrarías de pescadores de Burela, de San Ciprián, de Foz, e do Vicedo; representantes de asociacións de Mulleres en Igualdade tanto de Burela como de San Ciprián, da asociación contra co cancro Esperanza, de Burela, das asociacións de caboverdianos Batuko Tabanka e Batuvo Raventola, do colectivo de redeiras de Burela; e da asociación Raíces Peruanas, tamén de Burela. Diante de todos eles, con esta labor de autocrítica coa cal nos presentamos, escoitamos o seu sentir e comentáronnos varias cousas polas cales eles ven que dende o Partido Popular tíñamos que ir adaptándonos para parecernos máis á sociedade nestes momentos. O feito de ter máis presenza cos veciños é algo que se nos demanda, a maiores de outro tipo de peticións máis concretas en función de cada un dos colectivos que nos formulou as súas reivindicacións ou suxestións”.

Alfonso Villares rematou comentando que “foi unha reunión, sen dúbida ningunha, moi positiva, como todas as que levamos tido durante estes últimos días con outras asociacións da provincia de Lugo, xuntanzas das que vamos sacar as conclusións necesarias para que a ponencia política que presente o Partido Popular de Galicia neste mes de xullo sexa o máis parecida posible ao sentir da nosa sociedade”.