Ribadeo, 8 de xullo de 2015.- O 12 de setembro celebrarase a II Media Maratón Ribadeo-As Catedrais. O evento foi presentado este mércores ó mediodía no salón de plenos do Concello polo alcalde, Fernando Suárez, e polo concelleiro de Deportes, David Rivas. A inscrición ábrese ás doce da noite deste xoves.
O rexedor dixo que “despois desta experiencia tan marabillosa que tivemos o ano pasado na primeira edición desta sorprendente proba deportiva, que se realizou aquí en setembro coa que intentamos conxugar o deporte, o espírito deportivo, o esforzo, pero tamén a reivindicación do noso patrimonio natural, que temos afortunadamente aquí, en Ribadeo, tanto na propia praia das Catedrais en si, algo visitado por centos de miles de persoas de todo o mundo, como tamén nun litoral que escapou ás gadoupas daquela burbulla inmobiliaria que tanto mal fixo en sitios ben próximos ao noso, pero que afortunadamente aquí temos un patrimonio natural moi ben conservado e queremos precisamente facer gala diso”.
Suárez Barcia sinalou que “o deporte, aparte de ser un valor en si, tamén o é económico. Non é gratuíto que o ano pasado se inscribiran practicamente un milleiro de persoas e confiamos en que este ano veña moita xente tamén, dado que espertou un enorme interese esta media maratón, 21 quilómetros por lugares descoñecidos para moita xente, incluso de Ribadeo, aproveitando este carreiro que o Ministerio de Medio Ambiente, co apoio e a participación moi activa do Concello de Ribadeo á hora de poñer os terreos e buscar os camiños. Practicamente toda esta carreira vai por sitios paradisíacos, marabillosos, pola costa de Ribadeo, desde a vila pasando por as parroquias de Piñeira, Vilaselán, Rinlo e A Devesa, ata chegar á coñecida Augas Santas ou As Catedrais”.
O alcalde considera que “así que seremos outra vez un referente conxugando deporte, protección, reivindicación do patrimonio natural e tamén un guiño a que As Catedrais é moi importante para nós, pero tamén o é todo o litoral. E precisamente os deportistas de aquí, da comarca ou de moi lonxe, como o ano pasado, quedarán marabillados ao ver que Ribadeo ten moito máis que As Catedrais. Polo tanto confiamos en que a xente acuda en masa, como fixo o ano anterior”.
O concelleir de Deportes manifestou que “a carreira este ano, igual que o ano pasado, desenvólvese nun marco incomparable, como é o litoral ribadense, que as persoas participantes gozarán, sen ningunha dúbida. Proba disto é o enorme interese que desde hai unhas semanas está habendo por participantes da primeira edición, que están a contactar co Concello, por correo electrónico ou por facebook, para preguntar pola apertura de inscricións. Esta expectación augura outro éxito de participación, como xa foi o ano pasado, con 950 inscritos”.
David Rivas dixo que “con respecto á primeira edición a carreira deste ano mellora en canto á distancia a percorrer, xa que o ano pasado faltábanlle algo máis de 500 metros para ser unha media maratón real, polo que houbo atletas que se queixaron porque non lles servía de moito a marca que facían para comparala con outras probas similares e levar un control dos progresos. Así que decidimos modificar sutilmente o trazado na primeira fase, no casco urbano, para que este ano si teña a distancia oficial de 21.097 metros”.
O edil nacionalista contou que “se barallou a posibilidade de que a liña de meta estivese situada na mesma area da praia das Catedrais e así facela aínda máis espectacular e simbólica, pero desbotamos esta idea pola perigosidade que suporía que os últimos metros de carreira fosen na baixada de escaleiras á praia, xa que pensamos que isto podería causar algún accidente”.
Sobre os premios explicou que “haberá premios en metálico para cada categoría máis medallas para os tres primeiros clasificados por categoría. O prazo de inscrición empeza hoxe ás doce da noite e acaba o 8 de setembro, tamén ás doce da noite. Ata o día 14 de agosto hai un prezo de inscrición reducido, de 3 euros, e a partir do 15 de agosto ata o 8 de setembro son 5 euros por participante. Dentro deste prezo simbólico de inscrición inclúese unha camiseta conmemorativa de agasallo, como xa se fixo o ano pasado”.
Pódese consultar toda a información referente a esta media maratón na páxina web mediamaratonascatedrais.ribadeo.org e tamén calquera dúbida ou pregunta pode formularse no correo electrónico deportes@ribadeo.org.
O alcalde e o concelleiro de Deportes animaron á participación “pensamos que é unha carreira que non deixará indiferente a ningunha persoa que se anime a correla”. No acto de presentación tamén participou o técnico municipal de Deportes, Iván López.
A viaxe, enmarcada no proxecto «Relevo Xeracional: O Futuro do Mar» e organizada en colaboración co GALP Itsas Garapen Elkartea, permitiu achegarse a iniciativas como Kofradia Basque Seafood, a Escola de Pesca de Ondarroa, AZTI, Albaola ou o Itsas Museo de Donosti, así como a proxectos vinculados directamente á actividade pesqueira e á divulgación, incluíndo o uso de realidade virtual. O intercambio con Euskadi permitiu coñecer modelos que combinan formación, investigación, transmisión do coñecemento e modernización do sector, contribuíndo a identificar novas vías para facilitar a incorporación da mocidade á actividade pesqueira e garantir a continuidade das comunidades costeiras galegas.
A artista, referente da música popular galega, conectou cun público diverso que gozou dunha sesión vermú marcada por máis de trinta anos de traxectoria. O concerto serviu tamén como despedida e recoñecemento a Valentín González e Viviana Pérez, que deixan a organización da comisión de festas tras dúas décadas. O deputado de Mocidade, Daniel García, destacou a importancia da implicación veciñal para manter vivas as celebracións que fortalecen a identidade comunitaria e reafirmou o apoio da Deputación ás redes asociativas e á programación cultural en galego. A actuación forma parte da iniciativa provincial para achegar música tradicional e en galego a todos os públicos.
Cómpre sinalar que este produto conta cun distintivo de calidade diferenciada, a Indicación Xeográfica Protexida Faba de Lourenzá, un dos 36 selos recoñecidos en Galicia que amparan a súa excelencia. Neste sentido, a Xunta vén de lanzar a nova marca Aquí Sabemos, coa que se busca reforzar o coñecemento e a identificación por parte dos consumidores dos produtos alimentarios galegos protexidos por figuras de calidade diferenciada.
Co sol ocultándose e a lúa asomando entre as torres de Donlebún, o músico e divulgador reivindicou o poder evocador e transformador do bravú fronte á morriña paralizante. Na sala de lectura da biblioteca, Souto explicou a evolución do rock bravú no imaxinario galego, evocando as músicas populares que acompañaron durante décadas os remolques dos pascualiños e os labores comunitarios, e lembrando a vitalidade de grupos como Skornabois, Diplomáticos de Monte Alto, Xenreira, Zënzar, Pinto de Herbón ou os Rastreiros. A boa lembranza da súa anterior visita levou ao artista a pechar a velada interpretando o “Himno de Ribadeo”, composto por Arturo Mogo, nun final cheo de afecto pola vila e pola súa identidade cultural.
O evento ofrecerá mel, produtos de tempada, artesanía, gastronomía e outras propostas locais. O Concello do Valadouro mantén aberto o prazo de inscrición para persoas e empresas expositoras, que poden presentar a súa solicitude na sede electrónica ou nas oficinas do Centro Socio-cultural, Xuvenil e da Terceira Idade “Manuel Lourenzo” ata o martes 6 de outubro, ou ata completar os postos dispoñibles.
Estiveron organizadas por Acisa e financiadas pola Área de Medio Rural e Mar da Deputación de Lugo. 25 locais hostaleiros ofreceron tapas e racións en diversas preparacións. Acisa repartiu entre os establecementos 1.100 quilos de mexillóns para esta cita gastronómica. Ata Ribadeo se achegou o deputado Dani García, que estivo xunto á presidenta e o xerente de Acisa, Carmen Cruzado e Jesús Pérez, e os concelleiros ribadenses Martín Graña e Vicente Castro.
Neste espazo radiofónico Félix Jorquera falou coa alcaldesa de Lourenzá, Rocío López; co concelleiro de Cultura, Manuel Arango; con José Cuadrado, presidente da Indicación Xeográfica Protexida Faba de Lourenzá e pregoeiro desta edición da festa; co chef Pedro Barreira; e con Antonio Irimia, presidente do club VespaFaba & Clásicos, de Lourenzá. Por diante queda toda unha fin de semana chea de actividades arredor da faba de Lourenzá. Os organizadores animan a acudir a esta cita.
