Penabad lémbralle ao alcalde de Ribadeo que Mirasol é un porto competitivo e atractivo para as empresas “grazas ás medidas da Xunta e non as súas xestións como alcalde”

Lugo, 15 de outubro de 2015.- O presidente do Partido Popular de Ribadeo e voceiro do Grupo Municipal local, Jesús López Penabad, quixo manifestar a alegría dos populares ante a decisión da empresa Ence de continuar a traballar en Mirasol ao tempo que lle lembran ao alcalde da localidade que “estas noticias positivas son o resultado dun compromiso claro e manifesto da Xunta de Galicia co porto de Ribadeo e non derivan da súa xestión, xa que unicamente se limita a poñer estorbos no camiño ante a creación de postos de traballo”.

López Penabad considera que “é de ben nacido, ser agradecido” e, neste senso, pon en valor o traballo do Goberno de Alberto Núñez Feijóo, que adoptou varias decisións que melloraron as condicións competitivas do Porto de Mirasol, como é, entre outras, a redución do pago das taxas portuarias impostas. “O traballo ben feito ao longo de anos trae resultados beneficiosos para todos os veciños e veciñas da nosa localidade”, engade o presidente dos populares de Ribadeo. “O alcalde debería saber recoñecer esta labor da Xunta de Galicia e apostar por un traballo conxunto, sen antepoñer os seus intereses partidistas e políticos ao benestar dos seus veciños. Tónica que caracteriza o seu Goberno”, matiza.

Suárez Barcia considera prioritario o partido e non os veciños
O presidente dos populares asegura que “o tempo descubre as intencións e pon a cada un no seu sitio” e no caso de Suárez Barcia evidencia que “o prioritario para o nacionalista é o seu partido e non o son os seus veciños de Ribadeo”. López Penabad acusa ao alcalde de non quererlle “poñer deberes ao BNG na Deputación de Lugo e por iso se negou a que Ribadeo conte cun campo de fútbol con herba artificial”.

“Temeroso do que podería chegar a pasar e que se confirmou a semana pasada, o alcalde non quixo obrigar aos nacionalistas a mellorar o Pepe Barrera, por iso se decidiu por non facer unha obra moi necesaria para Ribadeo e preferiu nin tan sequera solicitar ese investimento para a localidade”, aclara López Penabad. “Nin quere recoñecer o traballo ben feito en beneficio de Ribadeo, nin quere facelo el”, conclúe o popular.