A Xunta aportará 1,47 millóns de euros para unha nova depuradora en Cervo

SANTIAGO .- O Consello da Xunta aprobou hoxe un acordo de colaboración técnico-financeiro co concello de Cervo para facer unha nova estación depuradora por un importe de 1.477.469,10 euros. Tamén autorizar a AGADER para o pagamento de ata o 100% das subvencións aos grupos de desenvolvemento rural.

NOTA DE PRENSA
O CONSELLO DA XUNTA APROBA A COLABORACIÓN TÉCNICO-FINANCEIRA CO CONCELLO DE CERVO PARA EXECUTAR UNHA NOVA ESTACIÓN DEPURADORA POR UN IMPORTE DE CASE 1,5 MILLÓNS DE EUROS

o
A Xunta financiará o 100% das obras, que darán servizo a unha zona de máis de 1.500 habitantes e terán un prazo de execución de 12 meses
o
As obras da nova EDAR contribuirán ao saneamento do río Xunco, á beira do cal se atopan as instalacións da fábrica de Sargadelos.
o
Dentro do acordo entre a Xunta e a Confederación Hidrográfica do Cantábrico para a realización de infraestruturas hidráulicas, o organismo estatal está executando a obra de colectores e depuradora en San Cibrao, adxudicada por 3 millóns de euros
o
Esta Edar non contempla emisario submarino para a vertedura do efluente ao mar, polo que Augas de Galicia está iniciando a redacción do proxecto do dito emisario

O Consello da Xunta autorizou esta mañá a sinatura dun acordo polo que se aproba a colaboración técnico-financeira entre a Consellería de Medio Ambiente, Territorio e Infraestruturas e o concello de Cervo, que ten como principal obxectivo a execución de anteproxecto de colectores xerais e unha nova estación depuradora neste concello lucense, ao cal se destinarán máis de 1.700.000 euros, dividido en tres anualidades.

Así, neste mesmo exercicio, a Xunta de Galicia fará un investimento de 175.275 euros; no ano 2010 achegaranse 1.477.469,10 euros; e no ano 2011 o gasto suporá un custe de 100.000 euros. O departamento que dirixe Agustín Hernández financiará o 100% do custo das obras, que se executarán nun período de 12 meses e que ao seu remate darán servizo a máis de 1.500 habitantes dos núcleos de Cervo e Figueirido.

Este tipo de obras responden á colaboración que establece a Consellería de Medio Ambiente, Territorio e Infraestruturas coas entidades locais para o desenvolvemento de infraestruturas, debido a que os concellos teñen un orzamento insuficiente para poder financialas.

Obras a realizar

O organismo autonómico Augas de Galicia levará a cabo distintas actuacións, co fin de resolver as carencias da rede de saneamento dos núcleos de Cervo e Figueirido, que inclúen verteduras de augas residuais sen depurar ao río Xunco, polo que se propón a construción dunha nova estación depuradora con capacidade para dar servizo a máis de 1.500 habitantes, así como colectores que unidos á rede actual, levarán a auga á Edar. Tamén se realizarán melloras na rede de Figueirido.

As actuacións previstas para a zona de Cervo inclúen un novo colector de residuais estanco paralelo á marxe dereita do río Xunco, fóra da zona de servidume agás un pequeno treito, que levará as augas de Cervo ata a Edar. Tamén será necesario un bombeo con 25 metros de impulsión para elevar as augas residuais da rúa Soto e parte da rúa Xosé Álvarez ata a nova rede. Ademais, farase unha rede separativa para pluviais na rúa do Vilar, que verterá ao río Xunco, e na avenida de Galicia e rúa Xosé María Cao, que se conectará á rede de pluviais actual. En total empregaranse mil metros de tubaxe.

Así mesmo, en Figueirido porase na depuradora prefabricada existente unha reixa na arqueta de desbaste, a cal se dotará dun aliviadoiro e procederase á correcta execución do separador de graxas e da arqueta de inspección. Por outra banda, o colector actual repararase á súa chegada a esta depuradora, acometendo a mellora da coieira de protección deste colector nun treito de 180 metros que se atopa en mal estado.

Así mesmo, levarase a cabo a Edar, que terá capacidade para os referidos 1.500 habitantes, cun caudal medio de 290 m3 /día e cun caudal punta de 36,25 m3/hora, nunha parcela de 1.425 m2 que estará situada no concello de Cervo.

Por outra parte, os actuais elementos de depuración serán demolidos e retirados, facendo neste lugar un recheo e coieira de sostemento para ampliar a estrada actual.

Outras actuacións en marcha

Dentro do acordo entre a Xunta e a Confederación Hidrográfica do Cantábrico para a realización de infraestruturas hidráulicas na nosa comunidade, o organismo estatal está executando a obra de colectores e depuradora de augas residuais en San Cibrao, adxudicada por 3 millóns de euros, con capacidade para 8.000 habitantes. Esta Edar non contempla emisario submarino para a vertedura do efluente ao mar, polo que Augas de Galicia está iniciando a redacción do proxecto do dito emisario.

——————————————————————————————————————————————————————————————–

O CONSELLO DA XUNTA AUTORIZA A AGADER PARA O PAGAMENTO DE ATA O 100% DAS SUBVENCIÓNS AOS GRUPOS DE ESENVOLVEMENTO RURAL

*
Co acordo de hoxe, os GDR terán solvencia para encetar algunhas das súas actuacións pendentes

O Consello da Xunta acordou autorizar a Axencia Galega de Desenvolvemento Rural (Agader), dependente da Consellería do Medio Rural, para a concesión de pagamentos anticipados por importe conxunto de ata o cento por cento da porcentaxe subvencionada correspondente aos pagamentos xustificados dos grupos de desenvolvemento rural (GDR). Estes pagamentos refírense a gastos de funcionamento, adquisicións necesarias, e promoción en cadanseu territorio.

Estes GDR son asociacións sen ánimo de lucro compostas por un conxunto de interlocutores, públicos e privados, que representan axentes pertencentes aos distintos sectores socioeconómicos dun territorio determinado. Os GDR actúan como entidades colaboradoras e como beneficiarios nas subvencións concedidas polo programa Leader Galicia 2007-2013, cofinanciado polo programa europeo Feader e a propia Xunta de Galicia.

Precisamente, os GDR carecen doutro financiamento externo que non sexa este mesmo programa Leader, en cuxas bases reguladoras se establece a concesión destes pagamentos parciais e anticipos, de conformidade co disposto na Lei de subvencións de Galicia, e ao abeiro das disposicións comunitarias reguladoras dos programas europeos.

Información complementaria que non forma parte da nota de prensa da Xunta:

Na Mariña lucense constituíuse o Grupo de Desenvolvemento Rural -1 (GDR-1) integrado por preto de 200 asociacións, entidades e colectivos dos concellos de Ribadeo, Barreiros, Trabada, Lourenzá, Mondo?edo, Alfoz, O Valadouro, Foz, Burela, Cervo, Xove, Viveiro, Ourol y O Vicedo. A dotación teórica para o programa é de 4. 585.557 euros e os cálculos realizados para o gasto total ascenden a preto de 10.500.000€.

As axudas do Leader están destinadas ao desenvolvemento do medio rural, existindo varias liñas de axuda nas que se poden incluír os proxectos. Esta liñas son: dinamización do sector agrario e forestal, mellora medioambiental e do contorno rural e diversificación da economía rural e mellora da calidade de vida. Esta última medida é a que leva unha maior dotación de fondos, para tratar de acadar o obxectivo xeral de mellora da calidade de vida en zonas rurais e diversificación da economía rural. Nesta medida, inclúense actuacións como a transformación e venda de produtos agrarios na propia explotación; creación, ampliación, modernización e /ou traslado de Pequenas e Medianas Empresas en sectores da economías distintos ao da producción agraria primaria, fomento de actividade turísticas, etc.
A función principal do Grupo de Desenvolvemento Rural é a execución do Programa Leader, pero tamén cumprirá a función de orientar a promotores sobre outros programas de axudas e vehiculizará a participación noutros programas de desenvolvemento e valorización dos recursos do territorio, tal e como sinalou o Presidente do GDR.