“180.000 persoas non poden pagar en Galiza o recibo da luz” dixo Olalla Rodil

Lugo, 16 de decembro de 2015.- Olalla Rodil, candidata ao congreso, por Nós-Candidatura Galega lembrou en Lugo que “180.000 persoas non poden pagar en Galiza o recibo da luz e esto supón levar á xente a vivir na escuridade e pasar frío mentres as eléctricas se enriquecen á costa dos nosos recursos”. Nós-Candidatura Galega aposta por unha tarifa eléctrica galega que suporía unha redución do 30% na factura eléctrica para garantir que todo o mundo poida afrontar o seu pago. Olalla Rodil lembrou que “tamén para as empresas, autónomos e gandeiros o consumo enerxético é unha importante carga que incrementa os seus problemas de viabilidade”.

A candidata ao congreso explicou que dende o ano 2007 a incidencia da pobreza enerxética no estado español triplicouse por unhas políticas do PP “dirixidas a beneficiar os grandes grupos empresariais e exprimir as persoas que viven do seu salario”. Rodil cargou contra o goberno da Xunta que “en vez de reivindicar unha tarifa eléctrica diferenciada para unha das zonas máis produtoras do estado, tenta lavarlle a cara ao seu presidente en Madrid chegando a acordos coas eléctricas para que sexamos todos as galegas e galegos quen lles arranxamos a conta de resultados a estas macroempresas”.

Nós-Candidatura Galega reivindicou, con tubos fluorescentes, a súa proposta de tarifa eléctrica galega ao carón da Muralla de Lugo. A candidata ao congreso sinalou que “somos un país que exporta enerxía pero os beneficios vanse a outras partes do estado e as empresas tributan en Madrid” e engadiu que “o feito de que o noso territorio sexa un dos que máis enerxía produce debería ter un retorno para a poboación”. Olalla Rodil lembrou que “en Euskadi xa se benefician dunha tarifa propia que amortiguou os efectos do encarecemento da electricidade nestes últimos anos”.

Actos en Rábade e Sarria
Durante a xornada Olalla Rodil participou, en actos electorais en Rábade e Sarria onde estivo acompañado por persoas que forman parte das candidaturas ao congreso e ao senado. Ademais en Rábade participaron o voceiro municipal Iván Sangiao e o candidato ao senado Xosé Luis Rivas “Mini”. No acto de Sarria participaron, entre outros, o voceiro municipal Efren Castro e o candidato ao senado Luís López Melle.