Miguel Anxo Fernán Vello: “A Mariña debería contar con un plan turístico común e un plan de ordenación dos recursos naturais”

Ribadeo, 16 de decembro de 2015.- En Marea estivo este mércores en Ribadeo para presentar as propostas da coalición á cidadanía da vila. No Salón de Actos da Casa Sindical, Miguel Anxo Fernán Vello, número 1 na lista ao Congreso pola provincia de Lugo; José Manuel Perez Afonso, número 3 ao Congreso e Carmen Granxeiro, número 2 ao Senado, estiveron apoiados polo deputado de AGE no Parlamento de Galicia Ramón Vázquez.

Fernán Vello comezou a súa intervención denunciando que “vivimos unha democracia amputada, condicionada e secuestrada, no que é o final dun ciclo político”.

Ademais, o candidato de En Marea referiuse a algún dos problemas concretos que sufre a vila de Ribadeo e a Mariña lucense. “Ribadeo, como capital da Mariña, sofre como outras vilas da zona, un problema endémico no que se refire ao transporte público e as conexións, tanto coa cidade de Lugo como con outras vilas mariñás -dixo-. O que existe ata o momento son servizos desconectados, desordenados e con frecuencias escasas, e iso xoga en contra da economía local”.

Fernán Vello tamén pensa que a Mariña debería contar cunha planificación turística común. “Cada concello ten o seu propio modelo de desenvolvemento e non existe un debate sobre o futuro do turismo na bisbarra -apuntou-. É preciso unha coordinación. Os plans localistas son plans da vella política e hai que colaborar e traballar en común” .

“Tampouco existe unha política para o rural, tanto no que afecta ao tema forestal como no que afecta a plans de reactivación, pensando na xente nova e en evitar o despoboamento -engadiu-. Hai que fomentar a participación da xente nova”.

E por último, outro tema que preocupa a Fernán Vello e a candidatura de En Marea é a protección da Ría. “Apostamos por un plan de ordenación dos recursos naturais e un plan reitor de uso e xestión da ría de Ribadeo”, apuntou.

Pola súa parte, o deputado de AGE Ramón Vázquez comezou a súa intervención recordando que tal día como hoxe nacía Rafael Alberti, “un autor que, como o noso candidato, asumiu dende o mundo da cultura a defensa dos dereitos dos asoballados”. “Dicía Alberti que a liberdade so a alcanzan aqueles que teñen verdadeiramente sede dela, e creo que estamos en un momento nos que temos esa sede, en un tempo de precariedade e de agresión salvaxe aos dereitos”.

“Tamén dicía que as grandes palabras non debían ser condenados á pena de norte. Estamos en tempo de eleccións e non é un momento só de compromiso verbal, é tempo tamén de feitos, e dende o 21 temos que comezar un proxecto político novo”.

A número 2 ao Senado, Carmen Granxeiro asegurou na súa intervención que pola rúa está percibindo que o proxecto de En Marea está despertando moita esperanza. “Esta é unha candidatura da cidadanía, dunha cidadanía que se organiza para destapar a corrupción, que loitou contra os desafiuzamentos e que leva moitos anos traballando duro para que a todos nos vaia moito mellor –dixo-. É unha candidatura que practica a escoita activa que non leva a cabo ningún candidato do bipartidismo ou de Ciudadanos”.

José Manuel Pérez Afonso, número 3 ao Congreso, destacou que foi un paso adiante deixar atrás os egos e as siglas para construír un proxecto común. “En Marea ten que ser unha familia, que pode ter as súas diferencias, pero que as deixa de lado para traballar no importante, neste caso, traballar pola xente”.

“Meu pai é un camareiro e miña nai unha persoa que limpa escaleiras, e estou orgulloso, porque esta revolución tamén vai de iso, que a xente normal ten que tomar a palabra. Estamos aquí polo futuro dos nosos maiores, dos nosos avós, que tamén merecen un futuro, dos nosos pais e dos nosos fillos -explicou-. O 15 M comezou unha nova transición e non rematará ata que vexamos a alguén decente na Moncloa. Esto é un proceso, pero é imparable”