A Vicepresidencia da Deputación de Lugo aproba axudas por importe de 500.000 €

Lugo, 5 de febreiro do 2016.- A Área de Cooperación e Asistencia aos Concellos da Deputación de Lugo aprobou na Xunta de Goberno axudas por importe de 500.000 euros, estas subvencións encádranse dentro das axudas de concorrencia competitiva encamiñadas tanto a dotación de novas infraestruturas para o suministro de auga no rural como para a mellora e acondicionamento de redes de abastecemento xá existentes.

Na Liña 1, adicada a creación de infraestruturas para novos abastecementos de auga, na cal o importe máximo da axuda podía chegar aos 30.000 euros, concedéronse un total de 18 axudas por un importe total de 350.000 euros, que beneficiarán a entidades e usuarios de 16 concellos.

A Liña 2, pola súa banda, concedeu 150.000 euros para acometer melloras nas redes de abastecementos xá existentes e que podía alcanzar ós 10.000 euros por axuda, que permitirá acometer 16 actuacións ao longo de 14 concellos de toda a provincia.

O voceiro nacionalista na Deputación de Lugo, Xosé Ferreiro, aclarou que “a Deputación de Lugo, no 2016 seguirá apoiando actuacións e inversións que axuden á mellora da calidade de vida das e dos cidadáns do rural dos Concellos da provincia., atendendo as propostas feitas directamente polas veciñas e vecinos deste ámbito, e afondando na súa participación nas decisións sobre os investimentos a priorizar nos orzamentos da Deputación”, sinalou.

“O cambio dos usos, costumes e actividades no rural fai que contar con bos subministros de auga sexa fundamental para non condicionar o seu desenvolvemento e manter o asentamento poboacional”, concluíu Xosé Ferreiro.