A taxa de criminalidade baixou en Galicia en 2015, manténdose como a cuarta comunidade máis segura de España

9 de febreiro de 2016.- A delegación do Goberno en Galicia informa de que o Ministerio do Interior publica este martes na súa páxina web (www.interior.gob.es) o último Balance de Criminalidade correspondente ao pasado ano, que comprende o global de infraccións penais coñecidas polos distintos Corpos policiais en 2015. Ofrece os datos desglosados por comunidades autónomas e provincias, e inclúe os datos referidos ás capitais de provincia e cidades de máis de 50.000 habitantes.

Segundo estes datos, no ano 2015 coñecéronse en Galicia un total de 76.683 infraccións penais, o que supón un descenso da criminalidade na comunidade autónoma de 1.570 infraccións penais (case un -2%) con respecto a 2014, cando se coñeceron 78.253.

A taxa de criminalidade (infraccións penais coñecidas por cada 1.000 habitantes) situouse en Galicia en 28,1 o pasado ano, rebaixando en 0.4 puntos a taxa rexistrada en 2014, que foi de 28,5.

Do mesmo xeito que en 2014, os resultados estatísticos obxectivos sitúan a Galicia en 2015 como a cuarta Comunidade Autónoma con menor taxa de criminalidade de España, situándose moi por baixo (-15.6 puntos) da taxa media nacional, que é de 43.7.

De feito, moi por baixo da media nacional mantense en 2015 a taxa de cada unha das catro provincias galegas, evidenciando tamén unha tendencia á baixa na taxa de criminalidade, que é maioritaria con respecto á taxa do ano pasado (Lugo, Ourense e Pontevedra baixan 0.5, 1.6 e 1.3 puntos respectivamente, mentres que A Coruña sobe 0,7) e xeneralizada con respecto á taxa de 2012.

Taxa de criminalidade nos últimos catro anos

Tipoloxías delituosas
Os datos sobre criminalidade atenden a uns indicadores de seguridade concretos, que se corresponden cos que establece a Oficina Europea de Estatística (EUROSTAT). O balance de 2015 mostra que practicamente todos eles experimentan un descenso en Galicia con respecto ao ano anterior: homicidios dolosos e asasinatos consumados (-5%), roubos con violencia ou intimidación (-3,1%), roubos con forza en domicilios (-1,9%), substracción de vehículos a motor (-21,3%), tráfico de drogas (-7,2), danos (mantéñense estables) e furtos (-4,2).

A destacar a evolución das substraccións en explotacións agrícolas ou gandeiras, que practicamente se reduciron á metade desde o ano 2012, cando se rexistraron 466 infraccións deste tipo. En setembro de 2013 puxéronse en marcha os equipos ROCA para combater este tipo de substracións e ese mesmo ano baixaron en Galicia a 413, mentres que en 2014 situáronse en 299 e en 2015 baixaron ata 274.