Ribadeo, 4 de agosto de 2017. Este mediodía tivo lugar na sede do Real Club Náutico de Ribadeo a presentación da 27ª edición da Semana Náutica Ría de Ribadeo, que se desenvolverá dos días 10 ao 16 deste mes coa celebración de varias regatas e o día 21 está previsto recuperar a tradicional Zalea a Abres.
O presidente do Real Club Náutico de Ribadeo, Ramón Acuña, manifestou neste acto que “para o Real Club Náutico de Ribadeo é unha satisfacción poder presentar un ano máis o cartel da Semana Náutica e este ano facelo na compaña do delegado territorial da Xunta de Galicia, a quen lle agradecemos a súa presenza neste acto. O cartel desta semana náutica é cedido por un pintor afincado en Figueiras, co que pode dicirse que este ano facemos un acto de irmandamento con ese pobo próximo”.
Ramón Acuña detallou que “a Semana Náutica comprende desde o día 10 deste mes e ata o sábado 19, cando será a entrega de trofeos. Temos unha serie de regatas que empezan o xoves día 10 co Trofeo Acisa de cruceiro local, e o venres día 11 é o segundo Trofeo do Banco Sabadell Gallego de vela tradicional. O sábado 12 hai un par de trofeos, un é da escola de verán, que é o Trofeo Seat Talleres Armando de vela lixeira para os nenos das escolas de vela; e pola tarde temos o sexto Trofeo Abanca, ás cinco, de cruceiro local. O domingo 13 é o XIX Trofeo da Escola Municipal de Vela, tamén de vela lixeira para os nenos, e pola tarde temos o 18 Trofeo Paradores de vela tradicional. O luns empezamos cunha xornada de portas abertas da embarcación de salvamento marítimo Salvamar Alioth e ás cinco da tarde o XXVII Trofeo Concello de Ribadeo de vela tradicional. O martes 15 será o sexto Trofeo Real Club Náutico de Ribadeo Semana Náutica de cruceiro local; e o último día, o mércores 16, o XIX Trofeo da Deputación de Lugo de vela tradicional. O sábado 19 faremos a entrega de trofeos da Semana Náutica”.
Ramón Acuña subliñou que “aínda que non está recollido no programa, pero si aparece na convocatoria que se lle enviou aos socios para a asemblea que se vai facer o día 16, queremos facer mención a que o día 21 se o tempo o permite, este ano afortunadamente conseguíronse os permisos, faremos a clásica Zalea que se facía á área recreativa de Abres. En caso de que non fora posible polo tempo ou porque as embarcacións non puideran chegar, poderíase substituír por unha zalea na ría dentro do mesmo ritmo que se viñeron facendo nestes anos atrás”.
O presidente do Real Club Náutico de Ribadeo engadiu: “pretendemos poñer de manifesto o labor que se ven desenvolvendo no Club Náutico durante estes anos en prol do fomento da vela deportiva e, sobre todo, buscando na canteira dos nenos para que se acheguen ao Club Náutico de Ribadeo para que poidan disfrutar de aquilo que para min é o máis grande que temos en Ribadeo, que é a nosa ría”.
Pola súa banda o delegado territorial da Xunta en Lugo, José Manuel Balseiro, presente neste acto, declarou: “é para min unha hora estar hoxe aquí nun ambiente tan agradable e tan propicio para o disfrute. A Semana Náutica chega á súa 27 edición e acredita unha traxectoria exitosa en canto á organización e á participación. Sen dúbida é posible grazas ao traballo dos responsables do Real Club Náutico de Ribadeo”.
Balseiro salientou que “o club é toda unha institución nesta vila, axuda a dinamizar e difundir os atractivos de Ribadeo coa celebración de eventos como o que hoxe estamos a presentar aquí. Entre o 10 e o 19 de agosto numerosos veciños, pero tamén, sobre todo, numerosos visitantes congregaranse no porto para disfrutar das competicións que están programadas. Para que este espectáculo teña o realce que merece é preciso realizar un traballo constante durante todo o ano, que é o traballo que veñen de facer vostedes. Neste punto teño que subliñar a excelencia das instalacións nas que aquí estamos e da xestión que leva a cabo a directiva do Club Náutico, que se veu recoñecida coa Q de calidade turística, coa bandeira azul e coa certificación ISO de calidade”.
O delegado da Xunta en Lugo manifestou tamén que “a comarca en xeral e Ribadeo en particular teñen no mar o seu principal atractivo turístico, o que nos obriga a realizar unha xestión responsable e sustentable deste recurso, á vez que, tamén por suposto, rendible”.
A 27ª Semana Náutica Ría de Ribadeo desenvolverase dos días 10 ao 16 deste mes. Ademais o 21 está previsto celebrar a clásica Zalea a Abres
Relacionado
-
O Concello de Viveiro lembra as normas de seguridade e convivencia para a Romaría do Naseiro, que comeza este venres
-
Ribadeo vive unha fin de semana gastronómica con catro grandes citas: Feira do Mel, Festa da Ría, Carne ao Caldeiro e Mercado do Camiño
-
As Festas Patronais de Xove chegan con cinco días de música, tradición e actividades para todos os públicos
Dende as 10 da mañá máis de 170 vehículos ocuparán o aparcamento de Coto ata as 13:30, cando partirán en caravana cara Arealonga. Alí permanecerán ata as 17:00, momento no que iniciarán a ruta pola estrada das praias, regresando ás 18:30 para a entrega de premios e a clausura, prevista para as 20:30. A cita reunirá máis de 300 participantes, con presenza de persoas chegadas de Pamplona, Bilbao e doutros puntos do Estado. O evento, organizado por retroclasicos_barreiros e co apoio do Concello, continúa a atraer amantes dos vehículos clásicos e a dar visibilidade á beleza de Barreiros.
A entidade, coa colaboración da Vicepresidencia da Deputación, organizará nas próximas semanas a XIII exposición Tal como eramos (28 de agosto), a proxección do filme Antes de nós (3 de setembro) e a homenaxe polo XXII cabodano de Manuel María (6 de setembro). A área de Cultura provincial reforza así o seu apoio continuado ao Iescha, referente na conservación e difusión da cultura galega e chairega.
No acto, o autor estará acompañado por Xosé Ramón Veiga, profesor de Historia Contemporánea na USC, e por Francisco Villamil, profesor de Ciencia Política na Universidade Carlos III. A Galicia moderna (1880-1939) desmonta a visión tradicional dunha Galicia rural, atrasada e pasiva no cambio de século, e amosa a profunda transformación económica, agraria e social que viviu o país nese período.
No acto intervirán o autor e Xoan Ramón Fernández Pacios, cronista oficial de Foz. A actividade está organizada pola Federación de Librarías de Galicia en colaboración co Concello de Foz.
Villares visitou a exposición fotográfica dedicada a Calvo-Sotelo, instalada na praza de Pancho Maseda, que forma parte do programa conmemorativo do centenario. A mostra reúne unha selección de imaxes seleccionadas pola propia familia do expresidente para achegar á cidadanía diferentes momentos da súa traxectoria persoal e política. A conmemoración, que se estende ao longo de todo 2026, busca poñer en valor a figura de Calvo-Sotelo e a súa relación con Ribadeo, onde deixou unha importante pegada vinculada, entre outras cuestións, ao impulso de infraestruturas.
Durante case dúas horas desenvolveuse unha conversa aberta arredor do mundo do espírito e do contido da obra, nun encontro ao que asistiu un grupo numeroso de persoas dispostas non só a escoitar, senón tamén a dialogar e compartir reflexións. Tras a intervención inicial de Pepe Peinó como responsable do proxecto, tomou a palabra o escritor Lionel Rexes, quen achegou novas perspectivas antes de abrir o debate ao público. As opinións, argumentos e matices sobre relixión, espiritualidade, Deus e os valores que sustentan a convivencia foron enchendo o espazo nun ambiente participativo e respectuoso, no que as diferenzas quedaron en segundo plano fronte á forza do diálogo, a solidariedade e o afecto.
O alcalde, Dani Vega, fixo un balance moi positivo: “foi un concerto moi especial nun marco espectacular, como é a igrexa parroquial de Ribadeo, e no que o gaiteiro Carlos Núñez encandilou aos asistentes co seu repertorio. Todos os asistentes disfrutámolo moito”. Xunto a Carlos Núñez estiveron o rexedor e as concelleiras de Cultura, Turismo e Seguridade, Begoña Sanjurjo, Marta Saiz e Montse Seijo.
