O Concello de Ribadeo conta por primeira vez cunha hidrolavadora autónoma, que está a permitir que se limpen beirarrúas e prazas con auga a presión

Ribadeo, 13 de outubro de 2017. A Área de Limpeza do Concello ven de adquirir unha hidrolavadora autónoma coa que está a realizar estes días traballos de lavado a presión en beirarrúas e prazas da vila.
O concelleiro de Limpeza Viaria e Xestión de Residuos, Jorge Díaz Freije, subliña que “nunca tivemos ata o de agora unha máquina destas características. E estamos moi satisfeitos de contar con ela porque facilitará moito as tarefas de limpeza de beirarrúas, prazas e outros puntos que o poidan necesitar”.
O edil ribadense sinala que “xa leva esta máquina uns días baldeando certas zonas coma beirarrúas, prazas… dentro dun planing de lavado a presión que deseñamos no Concello. Este tipo de lavado era unha necesidade en certas zonas, nas que pouco a pouco se vai ir actuando”. Unha das zonas nas que traballará esta hidrolavadora autónoma será no aparcamento da praza de abastos: “unha vez que remate a poda das árbores realizarase unha baldeo xeral”.
Díaz Freije pide “a máxima colaboración aos veciños e veciñas da vila de Ribadeo, xa que para que se poida conxugar o descanso con certas tarefas todos debemos colaborar no posible”.
O investimento nesta máquina hidrolavadora ascendeu a uns 4.000 euros.