Campaña de Sensibilización Turística da Mariña Lucense

Burela, 7 de Maio do 2018. No contexto das prácticas profesionais do Curso AFD de Promoción turística local e Atención ao visitante realizado no Centro de Formación Ocupacional do Concello de Burela, un grupo de cinco alumnos realizará a través dun Convenio ad hoc asinado coa Mancomunidade de Municipios da Mariña Luguesa, unha Campaña de Sensibilización para a poboación local sobre a actividade turística neste territorio.

Esta iniciativa xorde grazas a un motivado e sensibilizado grupo con diferentes inquedanzas e tan dispar como é a propia Mariña Lucense, que a través deste proxecto acadou un xeito de comunicar e promover os valores turísticos da zona, as veces tan descoñecidos para a propia poboación. A campaña realizarase co nome de marca #amaríñate (@amarinhate) e o slogan “namórate con nós” a través das redes sociais Facebook e Instagram que a partir de hoxe están operativas e ata agosto.

O contido da campaña intentará promover os recursos típicos do territorio e mais aqueles menos coñecidos incluso no ámbito local, promover produtos e servizos, entre eles especificamente os Espazos de Información (Oficina de Información Turística e mais Centros de Interpretación) e comunicar novas e eventos mais relevantes.