O Alcalde de Burela fai un chamamento á cidadanía para que non deposite toalliñas hixiénicas nos baños porque obstrúen as canalizacións da rede de saneamento. Alfredo Llano dixo que as inundacións do domingo causaron estragos na zona portuaria

Burela, 4 de xullo de 2018. As fortes choivas caídas o pasado domingo causaron estragos na zona portuaria de Burela e o alcalde, Alfredo Llano, quixo facer hoxe unha chamada á cidadanía para que non tire nos baños as toalliñas hixiénicas, xa que ocasionan auténticos tapóns nas canalizacións da rede de saneamento.
O rexedor lembrou que “o domingo, como noutros lugares da Mariña, no noso concello choveu moitisimo en pouco tempo. En Burela converxe toda a auga nun punto que é o porto, e as canalizacións satúranse inmediatamente e fixo algún estrago na zona portuaria. Nalgún sitio máis, pero onde máis importante foron foi na zona portuaria, xa que se satura a EDAR e as canalizacións que van á EDAR e ao mar directamente cando son pluviais. E isto produciu que se estropeara o asfaltado e que se levantaran sumidoiros na zona portuaria, polo tanto é unha preocupación”.
O alcalde dixo que “é certo que consideramos que cando estea rematada a nova EDAR se solucionará o problema, ou polo menos que se minimice. Nosoutros agora puxemos unha nova trituradora na EDAR que temos, que axuda moito, pero dado a intensidade da choiva era case imposible que as trituradoras fixeran algo, de feito saltaron as tapas nesa instalación”.
Llano salientou que “hai unha circunstancia que quero resaltar porque chama a atención. Sempre que existe unha rotura, unha inundación ou algo que estrague os sumidoiros de residuais, sempre aparece o mesmo causante, que son esta infinidade de toalliñas que se ven e aparecen cunha densidade extraordinaria. Estas toalliñas teñen as características de que non se disolven, non se rompen nin se desfán e o que ocorre é que se entremezclan entre elas, e cando cae moita auga taponan as canalizacións e fan que rebenten cara ao exterior, e aí aparecen milleiros de toalliñas hixiénicas”.
O rexedor quere “sensibilizar á xente de Burela, de toda a comarca e en xeral, de que as toalliñas non son para tirar polo inodoro. Sensibilizar neste senso porque se todos queremos que non afecte ao medio ambiente e non haxa estragos temos que procurar colaborar entre todos. Eu chamo a atención sobre isto porque sei que hai sitios que xa prohibiron a utilización de toalliñas porque crean uns problemas extraordinarios. Non é que as toalliñas soas provoquen problemas cando chove tanto, pero si facilitan que ocorran estas barbaridades cando cae tanta auga”.